Ugu yaraan laba qof ayaa ku dhintay, halka 17 kalena ay ku dhaawacmeen, oo ay ku jiraan haween iyo carruur, kadib markii weerar loo adeegsaday diyaarado aan duuliye lahayn oo ay fuliyeen ciidamada RSF uu ku dhacay hoy ay deggenaayeen barakacayaal oo ku yaalla magaalada El-Obeid ee koonfurta Suudaan, sida ay Isniintii sheegtay kooxda caafimaadka.
War-saxaafadeed ay soo saartay Shabakadda Dhakhaatiirta Suudaan ayaa lagu sheegay in weerarku uu beegsaday hoy mideysan oo loogu talagalay dadka barakacay oo ku yaalla magaalada, waxaana dadka dhaawacmay ka mid ahaa sagaal carruur ah iyo saddex haween ah.
Shabakadda ayaa cambaareysay waxa ay ku tilmaantay bartilmaameedsi ula kac ah oo lagu hayo rayidka barakacay, iyadoo weerarrada lagu qaadayo hoyga dadka ka cararaya rabshadaha ku tilmaantay “xadgudub cad” oo ka dhan ah sharciga bani’aadannimada iyo xeerarka caalamiga ah.
Shabakaddu waxay sheegtay in weerarrada joogtada ah ee lagu hayo magaalada toddobaadkii la soo dhaafay ay halis geliyeen dadka rayidka ah isla markaana ay sii xumeeyeen xaaladaha bani’aadannimo.
Waxay ugu baaqday bulshada caalamka iyo hay’adaha bani’aadannimada inay tallaabo qaadaan si loo ilaaliyo dadka rayidka ah loona cadaadiyo joojinta weerarrada lagu hayo goobaha rayidka.
Weerarkan ayaa yimid xilli ururka gobolka Afrika ee Intergovernmental Authority on Development (IGAD) uu ku baaqay in si degdeg ah loo joojiyo weerarrada lagu hayo El-Obeid.
Muddo ku dhow laba toddobaad, magaalada El-Obeid waxaa ka dhacay weerarro diyaarado aan duuliye lahayn loo adeegsaday oo lagu eedeeyay RSF, kuwaas oo lagu bartilmaameedsaday xarunta weyn ee korontada, bakhaarada shidaalka iyo xarumo kale oo rayid ah, taasoo sababtay dhimasho iyo dhaawac soo gaaray tobannaan qof, iyadoo kooxdaasi aysan weli wax faallo ah ka bixin eedeymaha loo jeediyay.
Bishii hore, Qaramada Midoobay ayaa ka digtay kororka weerarrada diyaaradaha aan duuliyaha lahayn ee ka socda gobolka Kordofan ee Suudaan, iyadoo sheegtay in weerarradaasi ay dileen ugu yaraan 880 qof oo rayid ah intii u dhaxaysay Janaayo iyo Abriil ee sanadkan.
Suudaan waxaa hareeyay colaad tan iyo sanadkii 2023, markii uu dagaal ka dhex qarxay ciidanka dowladda iyo RSF sababo la xiriira qorshayaal lagu doonayay in ciidankaas paramilitary-ga ah lagu daro militariga. Dagaalka ayaa sababay mid ka mid ah dhibaatooyinka bani’aadannimo ee ugu daran dunida, isagoo dilay tobannaan kun oo qof isla markaana barakiciyay ku dhowaad 13 milyan oo qof.
