Hoggaanka Baarlamaanka Soomaaliya, masuuliyiinta dib-u-eegista dastuurka iyo wakiillo ka socday Wasaaradda Caddaaladda ayaa Arbacadii daahfuray nuqullo daabacan oo Dastuurka Federaalka ah, tallaabadaas oo looga gol leeyahay in la ballaariyo helitaanka dukumentiga sharciyeed ee saldhigga u ah dalka iyo in la taageero hirgelintiisa gudaha hay’adaha dowladda.
Munaasabadda waxaa ka qayb galay Guddoomiye Ku-xigeenka Koowaad ee Golaha Shacabka, Sacdiya Yaasiin Xaaji Samatar, Guddoomiye Ku-xigeenka Koowaad ee Aqalka Sare, Cali Shacbaan Ibraahim, xubno ka tirsan Guddiga Madaxa-bannaan ee Dib-u-eegista iyo Hirgelinta Dastuurka (ICRIC), Xafiiska Dib-u-eegista Dastuurka, iyo wakiillo ka socday Wasaaradda Caddaaladda.
Mas’uuliyiintu waxay sheegeen in hindisahan uu muwaadiniinta Soomaaliyeed siin doono fursad ay si ballaaran ugu helaan dastuurka, isla markaana uu ka caawin doono hay’adaha dowladda inay si wax ku ool ah u hirgeliyaan qodobbadiisa.
Iyadoo ka hadleysay munaasabadda, Sacdiya ayaa sheegtay in labada aqal ee Baarlamaanku ay waqti iyo dadaal badan geliyeen sidii Soomaaliya u yeelan lahayd dastuur dhammaystiran oo aan mar dambe ku-meel-gaar ahayn, iyadoo ku tilmaantay dastuurka tiir muhiim u ah geeddi-socodka dhismaha dowladnimada dalka.
Daahfurkan wuxuu ku soo beegmayaa iyadoo Soomaaliya ay sii waddo dib-u-eegista iyo dhammaystirka qaab-dhismeedka dastuurkeeda iyada oo loo marayo hannaanada baarlamaanka iyo hay’adaha dowladda.
