Taageerayaasha kooxda kubadda cagta ee Turkiga, Galatasaray, ayaa muujiyay garab-istaaggooda Falastiiniyiinta ku nool Marinka Qaza ee go'doonsan iyo Daanta Galbeed ee la haysto, intii uu socday kulan ay la ciyaarayeen kooxda weyn ee Ingiriiska ee Liverpool.
Kulanka oo dhacay Talaadadii, ayaa taageerayaashu waxay siteen boorar ay ku qornaayeen erayo ay ka mid ahaayeen "Aadanuhu wuxuu damiirkiisii ku waayay Qaza" iyo "#XasuuqaFalastiin".
Boorar kale ayaa waxaa ku qornaa "Xoreeya Falastiin" iyo "U oggolaada dhallaanka Falastiin inay noolaadaan."
Dhinaca kale, ciyaarta kahor, taageerayaasha Galatasaray waxay tacsi u direen weeraryahankii geeriyooday ee Liverpool, Diogo Jota, oo bishii Luulyo ku dhintay shil gaari oo ka dhacay dalka Spain.
Taageerayaasha ayaa sidoo kale sitay boor ay ku qoran tahay "Marnaba ku ilaawi mayno," kaas oo sidoo kale lagu xusay ciyaaryahankoodii hore ee Galatasaray, Ahmet Çalık, oo isna sannado kahor ku dhintay shil gaari.
Galatasaray ayaa awoodday inay ka badiso kooxda heysata horyaalka Ingiriiska ee Premier League, kadib markii weeraryahankooda Victor Osimhen uu shabaqa dhex dhigay rigoore daqiiqaddii 16-aad ee ciyaarta.
Natiijadan ayey Galatasaray ku hanatay guusheedii ugu horreysay ee tartanka UEFA Champions League iyo 3-dii dhibcood ee ugu horreeyay ee tartanka xilli ciyaareedkan.
