Hay'adda Caalamiga ah ee Socdaalka (IOM) ee Qaramada Midoobay ayaa Khamiistii sheegtay in ku dhowaad 4.65 milyan oo rayid ah oo barakacay ay dib ugu laabteen deegaannadoodii Suudaan, iyadoo tirada dadka gudaha ku barakacay ee uu sababay dagaalka sokeeye ee socda ay sii yaraanayso.
Hay'addu waxay war-saxaafadeed ku sheegtay in xogtan cusub ay ku salaysan tahay sahanno laga sameeyay ku dhowaad 13,000 goobood oo ku kala yaalla 185 degmo oo ku baahsan dhammaan 18-ka gobol ee Suudaan.
IOM ayaa sheegtay in tirada dadka gudaha ku barakacay ay gaartay ku dhowaad 8.69 milyan oo qof oo ku kala sugan 185 degmo, taas oo 25% ka hooseysa heerkii ugu sarreeyay ee barakaca la diiwaangeliyay, isla markaana qiyaastii 1% ka yar tii bishii ka horreysay.
Sida ay sheegtay hay'addu, ku dhowaad 4.65 milyan oo qof ayaa dib ugu laabtay deegaannadoodii oo ku kala yaalla 74 degmo, iyadoo 82% ay ka soo laabteen goobaha barakaca gudaha dalka, halka 18% ay dib uga soo laabteen dalalka dibadda.
Waxay intaas ku dartay in carruurta da'doodu ka yar tahay 18 sano ay ka yihiin ku dhowaad kala bar dadka barakacay iyo kuwa dib ugu laabtay deegaannadoodii, iyagoo ka dhigan 55% dhammaan dadka gudaha ku barakacay iyo 50% dhammaan dadka dib u laabtay.
Hay'addu waxay sheegtay in tirada dadka dib ugu laabtay deegaannadoodii ay korortay 5% marka loo eego bishii hore.
15-kii Juun, IOM waxay sheegtay in tirada dadka gudaha ku barakacay ay hoos ugu dhacday ku dhowaad 8.8 milyan, halka tirada dadka dib ugu laabtay deegaannadoodii ay ahayd wax ka badan 4.4 milyan, taas oo 24% ka hooseysay heerkii ugu sarreeyay ee barakaca ee bishii Janaayo 2025, markaas oo tiradu gaartay ku dhowaad 11.6 milyan oo qof.
Hoos u dhaca tirada barakacayaasha waxaa loo aaneynayaa kororka dadka dib ugu laabanaya deegaannadooda kadib markii Ciidanka Suudaan ay dib ula wareegeen gobollada Khartuum, Sennar iyo Al-Jazirah oo ay hore u haysteen ciidamada Gurmadka Degdegga ah (RSF).
In kasta oo tirada dadka barakacay ay sii yaraanayso, haddana dhibaatada bani'aadannimo ee Suudaan ayaa weli taagan sababo la xiriira dagaalka u dhexeeya Ciidanka Suudaan iyo RSF, kaas oo billowday sannadkii 2023 kadib khilaaf ka dhashay sidii ciidamada Gurmadka Degdegga ah loogu dari lahaa ciidanka milatariga. Dagaalka ayaa sababay dhimashada tobannaan kun oo qof, wuxuuna barakiciyay ku dhowaad 13 milyan oo qof xilligii uu ugu darnaa, sida ay qiyaastay Qaramada Midoobay.
