Boqortooyada Ingiriiska ayaa joojisay tababar milatari oo ballaaran oo la qorsheeyay inuu dabayaaqada sannadkan ka dhaco Kenya kadib markii mas'uuliyiinta Kenya aysan bixin ruqsadihii looga baahnaa in lagu fuliyo howlgalka, sida ay Khamiistii sheegtay Wasaaradda Gaashaandhigga ee Britain.

Tababarka oo socon lahaa lix toddobaad, laguna magacaabo Haraka Storm, ayaa la qorsheeyay inuu ka dhaco gobolka Laikipia, oo qiyaastii 200 kiiloomitir (125 mayl) waqooyi kaga beegan caasimadda Kenya ee Nairobi. Haatan waxaa loo wareejin doonaa dal kale kadib markii aan la helin oggolaanshihii loo baahnaa.

War-saxaafadeed ay soo saartay Wasaaradda Gaashaandhigga ee Britain ayaa lagu sheegay inay ka xun tahay baaqashada tababarka, balse ay carrabka ku adkaysay inay weli ka go'an tahay sii wadista xiriirka dhow ee dhinaca difaaca ee kala dhexeeya Kenya.

“Boqortooyada Ingiriiska waxay si weyn u qiimeysaa xiriirka ay la leedahay Kenya, kaas oo ku dhisan dano wadaag, is-ixtiraam iyo iskaashi. Iskaashiga difaaca ee u dhexeeya UK iyo Kenya waa mid ka mid ah tiirarka ugu muhiimsan ee xiriirkeenna. Tababarrada iyo howlgallada wadajirka ah ee aan la leenahay Ciidamada Difaaca Kenya waxay gacan ka geystaan sugidda amniga shacabka Kenya iyo Britain,” ayay wasaaraddu tiri.

Wasaaraddu waxay intaas ku dartay inay sii wadi doonto la shaqeynta dowladda Kenya si loo joogteeyo iskaashiga milatari ee u dhexeeya labada dal.

Britain waxay Kenya ku leedahay joogitaan milatari oo joogto ah iyada oo loo marayo Cutubka Tababarka Ciidanka Britain ee Kenya (BATUK), halkaas oo kumannaan askari oo British ah ay sannad kasta ku qaataan tababarro, oo ay ku jiraan kuwo ay si wadajir ah ula sameeyaan Ciidamada Difaaca Kenya.

Joojinta tababarkan ayaa ku soo beegmaysa xilli iskaashiga difaaca ee labada dal uu wajahayo baaritaan iyo dhaleeceyn isa soo taraysa oo ka imanaysa bulshada iyo siyaasiyiinta Kenya.

Xildhibaannada Kenya ayaa ku baaqay in si adag loo kormeero BATUK isla markaana la xoojiyo isla-xisaabtanka sharci ee ciidamada Britain, halka bulshooyinka ku nool deegaannada u dhow goobaha tababarrada ay muujiyeen walaac ku saabsan saameynta deegaanka iyo bulshada ee ka dhalata tababarrada milatari.

Xiriirka labada dal ayaa sidoo kale waxaa saameeyay dacwado la xiriira BATUK, oo ay ku jirto baaritaanka muddada dheer socday ee dilkii haweeneyda u dhalatay Kenya, Agnes Wanjiru, sanadkii 2012. Askari hore oo British ah ayaa lagu soo oogay dacwad la xiriirta dilkeeda, wuxuuna wajahayaa hannaan lagu gacan gelinayo.

Waxaa sidoo kale jiray eedeymo la xiriira xadgudubyo galmo iyo waxyeello deegaanka ah oo lala xiriiriyay howlaha ciidamada Britain ee Kenya.

Inkastoo arrimahan ay sii xoojiyeen baaqyada ku aaddan dib-u-habeynta iskaashiga difaaca ee labada dal, haddana dowladda Britain iyo dowladda Kenya midkoodna si rasmi ah uguma xiriirin khilaafka ruqsadaha ee sababay baaqashada tababarka.

Wasaaradda Gaashaandhigga ee Britain iyo dowladda Kenya midkoodna ma sharxin sababta aan loo bixin ruqsadihii loogu baahnaa tababarka qorshaysnaa.