Amurka da Iran da kuma wasu daga cikin masu shiga tsakani na yankin sun tattauna kan sharuɗɗan yarjejeniyar tsagaita wuta ta kwanaki 45 wadda ka iya kawo ƙarshen yaƙin na har abada, a cewar kafar watsa labarai ta Axios.
Duk da cewa rahoton ya bayyana nasarar cim ma wani ɓangare na yarjejeniyar a cikin awanni 48 masu zuwa ba ta da yawa, amma yunƙurin ya kasance hanya ɗaya tilo da za a iya hana ƙaruwar rikicin.
Hakan zai haɗa da kai manya hare-hare kan kayayyakin more rayuwa na Iran da kuma ɗaukar fansa kan cibiyoyin samar da makamashi da ruwa a ƙasashen yankin Gulf.
Da farko dai, Shugaba Trump ya tsawaita wa'adin da ya ɗauka da cim ma yarjejeniya da Iran da awanni 20, inda ya ƙara wa'adin zuwa ranar Talata da ƙarfe 8 na dare agogon EST.
Trump ya shaida wa Axios cewa Amurka "tana kan tattaunawa mai zurfi" kuma akwai yiwuwar a cim ma yarjejeniya.
"Akwai dama mai kyau, amma idan ba su cim ma yarjejeniya ba, zan lalata komai a can," in ji shi.
Yarjejeniyar matakai biyu
Rahotanni sun yi nuni da cewa, an gudanar da shawarwarin cim ma yarjejeniyar ne ta hanyar masu shiga tsakani daga Pakistan, Masar, da Turkiyya, da kuma saƙonnin kai-tsaye tsakanin jakada Steve Witkoff da Ministan Harkokin Wajen Iran Abbas Araghchi.
Yarjejeniyar matakai biyun da aka gabatar ta ƙunshi tsagaita wuta na kwanaki 45 sannan a kawo ƙarshen yaƙin na har abada.
Masu shiga tsakani sun yi imanin cewa sake buɗe Mashigar Hormuz da kuma warware batun uranium ɗin Iran zai iya kaiwa a har a cim ma yarjejeniyar ƙarshe.
'Yan Iran sun bayyana ƙarara cewa ba sa son "yanayin Gaza ko Lebanon" ya faru da su, inda a takarda ne batun tsagaita wuta ke wanzuwa kawai.
A halin yanzu, rundunar sojojin ruwan IRGC tana ci gaba da tsayin daka, inda ta bayyana cewa yanayin Mashigar Hormuz ba zai taba dawo wo zuwa yadda yake kafin somawar yaƙin ba.
Masu shiga tsakani sun jaddada wa jami'an Iran cewa babu wani arin lokaci na dabaru, domin awanni 48 masu zuwa suna wakiltar dama ta ƙarshe ta hana ɓarna mai yawa.
