Babban ɗan wasan Real Madrid, Kylian Mbappe ya ce matakin kin sanya rigar Ceuta yadda ya kamata da yi, ya yi ne don nuna goyon bayansa ga mutanen Ceuta saboda baƙin haure da suka rasa rayukansu.
An soki 'yan wasan Real Madrid Mbappe da Vinicius Junior da kuma Ibrahima Konate, har da shugaban gasar La Liga, Javier Tebas, saboda yadda suka sanya rigar ba daidai ba ta hanyar nade wani bangarenta sama kafin wasan da suka doke Elche a gasar La Liga ranar Talata.
Sauran 'yan wasan ƙungiyar da na Elche sun sanya rigar wacce ke dauke da rubutun "mu duka 'yan Ceuta ne" yadda ya kamata; an yi hakan ne domin aika sakon goyon baya ga mutanen Sifaniya da ke Arewacin Afirka, wanda a kwanan nan ya fuskanci rikicin bakin haure.
Mazauna yankin sun koka kan yadda bakin haure daga Moroko ke zama a yankin bakin teku da kuma kwana a kan tituna, lamarin da ya haifar da cunkoso da kuma rikicin jinƙai a birnin.
Mutane da dama sun rasa rayukansu yayin ƙoƙarin ketarewa zuwa wani yankin a watan Yuli.
Hatsarin ketarawar bakin haure
Kungiyar Kare Hakkokin Ɗan Adam ta Moroko (wacce ke zaman kanta) ta yi hasashen cewa adadin wadanda suka mutu ya kai akalla 141.
"Abu na farko da nake son fada shi ne, ina tare da mutanen Ceuta da dukkan wadanda lamarin ya shafa baki daya, domin kafin in zama ɗan wasa, ni ɗan adam ne," in ji Mbappe a hirarsa da jaridar AS ta kasar Sifaniya.
"Kuma ina son yin wani abu da zan nuna jimami na game da dukkan bakin haure da suka rasa rayukansu da kuma wadanda ke rayuwa cikin mawuyacin hali."
Dubban bakin haure ne suka isa Ceuta daga Moroko a ranakun 30 da 31 ga watan Yuli. Yawancinsu sun koma bayan isowarsu, amma wasu dubbai sun ci gaba da zama a Ceuta.
Mbappe ya ce yana son aika "sakon zaman lafiya" ne, kuma ya jaddada cewa bai yi hakan domin nuna rashin girmamawa ga mazauna Ceuta ba.
"Ba yanayi mai sauki ba ne, yanayi ne mai wahala, domin a karshe mutane na iya tunanin cewa ina adawa da mutanen Ceuta, amma a'a, kwata-kwata ba haka ba ne," in ji Mbappe.
"Ba ni da wata matsala da su, kuma ina goyon bayansu dari bisa dari. Sai dai kuma ina so na yi la'akari da dukkan mutanen da ke cikin kunci, domin a ƙarshe ni ma ɗan adam ne, kuma ba na son sanya kunci a matsayin abin da yake kan gaba."
