Rais wa Uturuki Recep Tayyip Erdogan na Rais wa Marekani Joe Biden wamejadili vipaumbele vya ulinzi na kiuchumi kwenye mkutano wao, Ikulu ya White House ilisema, siku moja baada ya Ankara kuunga mkono Sweden kujiunga na muungano wa kijeshi wa NATO.
"Walijadili pia masuala ya kikanda ya maslahi ya pamoja, ikiwa ni pamoja na msaada wao wa kudumu kwa Ukraine na umuhimu wa kuhifadhi utulivu katika Aegean," Ikulu ya White House ilisema katika taarifa Jumanne kufuatia mkutano wao kando ya mkutano wa NATO nchini Lithuania.
"Nataka kukushukuru kwa udiplomasia wako na ujasiri wako wa kukabilina na hilo. Na ninataka kukushukuru kwa uongozi wako," Biden alimwambia Erdogan kwa kukubali kupeleka Bunge la Uturuki itifaki ya Uswidi kujiunga na NATO.
Uturuki "inaanzisha mchakato mpya" na Marekani, Erdogan alisema. Alisema mikutano ya awali na Biden ilikuwa "vikao vya mwanzo tu," na kuongeza, "Sasa tunaanza mchakato mpya."
Erdogan alisema anaamini ni wakati mwafaka wa mashauriano katika ngazi ya wakuu wa nchi na Marekani kama sehemu ya utaratibu wa kimkakati.
"Nauchukulia mkutano huu kama hatua ya kwanza kuelekea hilo," aliongeza.
Erdogan pia alimtakia rais huyo wa Marekani mafanikio mema katika kampeni zake za kuchaguliwa tena mwaka 2024.
"Sasa, unajitayarisha kwa uchaguzi ujao," Erdogan alimwambia Biden.
"Na kwenye uchaguzi ujao, ningependa kuchukua fursa hii kukutakia mafanikio mema." Biden, akicheka, alijibu, "Asante ... ninatarajia kukutana nawe ndani ya miaka mitano ijayo."
Uhamisho wa ndege za F-16 hadi Uturuki
Utawala wa Biden utaendelea na uhamisho wa ndege za kivita za F-16 kwa Uturuki ikishauriana na Congress, mshauri wa usalama wa taifa Jake Sullivan alisema mapema.
Afisa mmoja wa Marekani aliliambia shirika la habari la AFP kuwa Ikulu ya White House sasa "inashirikiana kikamilifu" na bunge la Marekani, ambapo kumekuwa na upinzani mkubwa dhidi ya kuruhusu uuzaji huo.
Mnamo Oktoba 2021, Uturuki iliiomba kununua ndege ya kivita ya aina ya 'Lockheed Martin Corp F-16' yenye thamani ya dola bilioni 20 na takriban vifaa 80 vya kisasa kwa ajili ya ndege zake za kivita zilizopo.
Akizungumza kabla ya mkutano wa viongozi wa NATO nchini Lithuania, Sullivan alisema, Biden "amekuwa wazi kwamba anaunga mkono uhamisho huo."
"Hajaweka tahadhari juu ya hili ... Ana nia ya kuendelea na uhamisho huo," Sullivan aliwaambia waandishi wa habari, bila kufafanua muda.
Mwenyekiti wa Kamati ya Mahusiano ya Kigeni ya Seneti ya Marekani Bob Menendez, mwanachama wa Demkrat ambaye amepinga uuzaji wa F-16, alisema Jumatatu kuwa, alikuwa kwenye mazungumzo na utawala wa Biden kuhusu msimamo wake na kwamba anaweza kufanya uamuzi "katika wiki ijayo."
Msemaji wa wizara ya mambo ya nje Matthew Miller amesema kuwa waziri wa mambo ya nje Antony Blinken amezungumza na waziri wa mambo ya nje wa Uturuki Hakan Fidan na wajumbe wa bunge akiwemo Menendez katika wiki za hivi majuzi.
"Na kama alivyosema mshauri wa usalama wa kitaifa leo, tutaendelea na uuzaji huo, ambao tunaelewa kuwa unahitaji kuidhinishwa na bunge la Congress," aliambia mkutano vyombo vya habari wa kila siku.
