na Kudra Maliro
Mashindano hayo yalikuwa fursa ya kuhakikisha ushirikishwaji kwa watu wanaoishi na ualbino.
Kote Kusini mwa Afrika, ambako watu wanaoishi na ualbino wanakabiliwa na changamoto nyingi ikiwa ni pamoja na mashambulizi ya kimwili, mashindano ya urembo kwa watu wenye hali hiyo yalitoa nafasi ya kubadilisha baadhi ya mitazamo iliyoenea.
Shindano la kikanda la Bwana na Bibi Albino lilifanyika katika mji mkuu wa Zimbabwe, Harare, mwezi huu na kushirikisha wagombea 18 kutoka Afrika Kusini, Zambia, Msumbiji, Malawi, Angola na Tanzania.
Andreia Solange Sicato Muhitu wa Angola alitangazwa mshindi wa shindano la urembo la Bibi Albino Kusini mwa Afrika, huku Mzimbabwe Ntandoyenkosi Mnkandla akishinda taji la Bwana Albino
Muhitu mwenye umri wa miaka 28 anafanya kazi kama mkuu wa idara ya utalii katika jimbo la Cuando Cubango, kusini-mashariki mwa Angola na alisema ameshiriki katika mashindano kadhaa ya urembo nchini mwake tangu akiwa kijana, na ameshinda baadhi.
Lakini hakuna iliyomfanya ajisikie ameridhika zaidi kuliko shindano la kikanda.
“Ninaweza kuwatia moyo wasichana wadogo hasa wale wenye ualbino kujisikia vizuri na warembo katika ngozi zao,” alisema Muhitu. "Huo ndio ujumbe mzito tunaotarajia kuupata."
Hafla hiyo iliandaliwa kwa lengo la kuwawezesha watu wenye ualbino kujisikia warembo na kuwatia moyo kutimiza ndoto zao. Washiriki walijumuisha wanamitindo, wafanyakazi wa afya na wanamitindo wa kitaalam.
Wakipeperusha bendera zao za taifa, waliburudisha hadhira kwa mashairi, nyimbo na ngoma.
Waliandamana kwa umaridadi wakiwa wamevalia mavazi ya kitaalamu, gauni za jioni na mavazi ya kitamaduni ya Kiafrika yaliyotengenezwa kwa ngozi za wanyama kabla ya kujibu maswali kutoka kwa jopo la majaji kuhusu mada mbalimbali za kijamii na kiuchumi.
Wagombea walishindanishwa kwa hulka zao, kujiamini, mienendo Yao na akili zao.
Washindi hao pia walipokea zawadi za fedha taslimu, medali na maua kwa vipengele kama vile Bibi mwenye muonekano ambaye ni chaguo la watu. Mshindi wa Bibi Albino 2023 alitunukiwa Dola za Kimarekani 250.
Ualbino umeenea zaidi katika Kusini mwa Jangwa la Sahaŕa, ambapo unampata mtu mmoja kati ya 5,000, kulingana na Umoja wa Mataifa.
Maambukizi yanaweza kuwa ya juu kama 1 kati ya 1,000 katika baadhi ya watu nchini Zimbabwe na maeneo mengine ya kusini mwa Afrika, ikilinganishwa na 1 kati ya 17,000 hadi 20,000 Amerika Kaskazini na Ulaya.
"Taji hili linanipa fursa ya kuleta mabadiliko katika maisha ya watu wenye ualbino kwa namna ambayo sikuwahi kufikiria, si katika nchi yangu tu, bali katika ukanda mzima. Sioni aibu, najisikia kuwezeshwa," anamalizia Bi Muhitu.
