DJ Maphorisa anachukuliwa kama mmoja wa watayarishaji wa muziki wenye vipaji vikubwa zaidi kutoka Afrika Kusini.
Ni DJ mahiri, mwimbaji, na mtunzi wa nyimbo ambaye mashabiki wake wakubwa wanamuita ‘’Mfalme wa Amapiano’’, muziki maarufu wa kudensi kutoka Afrika Kusini.
DJ Maphorisa, jina lake halisi Themba Sonnyboy Sekowe, alizaliwa Novemba 15, 1987, huko Soshanguve, Afrika Kusini. Baba yake ni Mnigeria na mama yake ni Mwafrika Kusini.
Alizaliwa katika familia ya wanamuziki; mama yake anayejulikana sana kama Mama Maphorisa alikuwa msanii wa injili, na mjomba wake alikuwa mwanakwaya wa Kwaya maarufu ya Soweto Gospel Choir.
Akizungumza kwenye mahojiano mwaka 2018, DJ Maphorisa alisema kuzaliwa katika familia ya wanamuziki kulichangia sana yeye kuthamini kwake muziki, na kwamba alikua akijifunza vyombo vya muziki, hatimaye kumfungulia dunia ya utayarishaji muziki akiwa na umri mdogo sana.
Kufikia ujanani, Maphorisa alikuwa ameanza kutumbuiza kwenye matamasha, lakini akiwa na umri wa miaka 17, DJ Maphorisa anasema aliamua kuacha shule kwa sababu alihitaji muda wa kufuata ndoto yake kama msanii katika tasnia ya burudani.
Uamuzi huo haukupokelewa vizuri na wazazi wake, lakini hatimaye DJ Maphorisa angeenda kuwafanya wajivunie sana.
DJ Maphorisa anatambuliwa kwa kutoa mvuto mpya na wa kimataifa kwa Amapiano alipoanza kutengeneza vibao vilivyotumia sauti hiyo na kuwa maarufu duniani.
Mwaka 2016, alishirikiana kutayarisha One Dance ya rapa wa Canada Drake, na ilikuwa hit duniani.
One Dance ilikuwa moja ya nyimbo kubwa zaidi za 2016 na ilithibitishwa kuwa platinum – hadhi ya kifahari katika tasnia ya muziki - katika angalau nchi 10 ndani na nje ya Afrika. Pia ilifikia namba moja katika angalau nchi 15. Ni wimbo uliosikilizwa zaidi katika huduma ya usambazaji muziki ya Spotify nchini Marekani.
DJ Maphorisa ameendelea kutayarisha vibao kwa wasanii wengine wa Kiafrika na wa kimataifa. Ushirikiano wake na Wizkid kwenye Soweto Baby ulikuwa mafanikio makubwa.
DJ Maphorisa hutoza takriban Dola za Marekani Elfu Nne kwa kila onyesho na ameshinda tuzo nyingi, ikiwa ni pamoja na tuzo ya DJ wa Mwaka wa Afrika katika Tuzo za MVP za SoundCity za 2023.
DJ Maphorisa hajaoa lakini ana binti wa miaka 15 anayeitwa Lesidi.
