Waziri wa zamani wa afya katika Jamhuri ya Kidemokrasia ya Kongo ameachiliwa kutoka jela baada ya kutumikia kifungo cha miaka mitano kwa ubadhirifu wa fedha zilizokusudiwa kukabiliana na janga la Ebola nchini humo, wakili wake aliiambia AFP siku ya Jumanne.
"Daktari Oly Ilunga aliachiliwa kutoka gereza la Makala jana (Jumatatu) baada ya kutumikia kifungo chake cha miaka mitano kikamilifu," Guy Kabeya alisema.
Ilunga alikuwa serikalini kuanzia mwishoni mwa 2016 hadi Julai 2019.
Mahakama ilimpata Ilunga na hatia ya ubadhirifu wa karibu dola 400,000 alipokuwa akisimamia mojawapo ya mlipuko mbaya zaidi wa Ebola nchini DRC.
Mlipuko wa magonjwa hatari
Mlipuko wa Ebola ulikuwa wa pili kwa vifo zaidi katika historia ya nchi hiyo na vifo zaidi ya 2,200 kati ya Agosti 2018 na Juni 2020.
Alihukumiwa miaka mitano na kazi ngumu mwaka 2020, ambayo kwa kawaida hupelekea kifungo cha jela katika nchi hiyo ya Afrika ya Kati.
Ilunga, ambaye aliongoza kundi la hospitali nchini Ubelgiji kabla ya kuwa waziri wa afya, amekuwa akikana mashtaka na kusema kesi yake ilikuwa na dosari na inakiuka sheria.
Mnamo 2019, Ilunga alijiuzulu wadhifa wake wa uwaziri baada ya kutofautiana na Rais Felix Tshisekedi, kwa sehemu kuhusu vita na Waziri Mkuu kuhusu janga la Ebola.
Eneo la jaribio la kutoroka jela
Gereza la Makala ambako alifungwa ndilo gereza kubwa zaidi nchini humo, lililo katika mji mkuu wa Kinshasa na lilikuwa eneo la jaribio la kutoroka jela wiki iliyopita, kulingana na mamlaka.
Jaribio la kutoroka jela lilisababisha vifo vya takriban watu 129 na kusababisha wanawake kubakwa, kulingana na waziri wa mambo ya ndani.
Gereza la Makala lina uwezo wa kuchukua wafungwa 1,500, lakini limejaa na mashirika ya kutetea haki za binadamu yanalalamika mara kwa mara kuhusu hali ya kizuizini katika jela hiyo.
Jela hiyo inashikilia wafungwa 14,000 hadi 15,000, kulingana na takwimu rasmi.
