Muungano wa waasi wa Mashariki mwa Congo unaojumuisha M23 umetangaza kusitisha mapigano ili kutoa fursa kwa watu kupata misaada kuanzia Februari 4, kundi linalojulikana kama Muungano wa Mto Congo lilisema katika taarifa.
Muungano huo uliongeza kuwa haukuwa na nia ya kuuteka Bukavu, mji mkuu wa jimbo la Kivu Kusini, baada ya kuuteka mji mkubwa zaidi wa mashariki mwa Congo wa Goma wiki iliyopita.
Waasi wa M23, ambao hivi karibuni walizidisha mapigano mashariki mwa Congo, walidai kudhibiti Goma, mji mkuu wa jimbo la Kivu Kaskazini, wiki iliyopita.
Mapigano makali kati ya vikosi vya serikali na waasi yamesababisha vifo na majeruhi kadhaa.
Wizara ya Afya ya DRC ilisema Jumamosi maiti 773 zilikuwa katika vyumba vya kuhifadhia maiti huko Goma kufikia Januari 30 na baadhi zimesalia mitaani kutokana na msongamano katika vyumba vya kuhifadhia maiti.
Muungano wa waasi ulisema unalaani vikosi vya jeshi la Congo kwa kuendelea kutumia ndege za kijeshi katika uwanja wa ndege wa Kavumba, ambapo wanadaiwa kubeba mabomu ambayo yanaua raia wao katika maeneo yaliyokombolewa.
Pia walisema hawana nia ya kuteka Bukavu, mji mkuu wa jimbo la Kivu Kusini, au maeneo mengine.
"Hata hivyo, tunasisitiza ahadi yetu ya kulinda na kutetea raia na nyadhifa zetu," ilisema taarifa hiyo.
Congo, hata hivyo, imeapa kuudhibiti tena mji wa Goma, jiji la karibu watu milioni 3. Kinshasa imeishutumu Rwanda kwa kutuma wanajeshi huko Goma kuwaunga mkono M23.
Rais wa Rwanda Paul Kagame ambaye mara kwa mara amekanusha madai ya kuunga mkono M23 siku ya Jumatatu aliripotiwa kuwaambia CNN kuwa hajui kama wanajeshi wa nchi yake wako mashariki mwa Congo, ambako mapigano kati ya kundi la M23 na wanajeshi wa Congo yameua mamia ya watu.
