Chama cha Umkhonto weSizwe (MK) cha Afrika Kusini kimeiomba Mahakama ya Uchaguzi itangaze kuwa uchaguzi mkuu wa 2024 haukuwa huru na wa haki na hivyo ni batili, vyombo vya habari vya serikali SABC vinaripoti.
Chama hicho pia kinataka, miongoni mwa mambo mengine, amri kutoka kwa mahakama inayoelekeza rais kuitisha uchaguzi mpya kufanyika.
Katika karatasi zilizowasilishwa, chama hicho kinadai "kwa uwezekano wote kingeshinda" uchaguzi kama zoezi hilo lingefanywa kwa "njia huru na ya haki."
Chama cha MK, ambacho hakikuwepo katika kikao cha kwanza cha Bunge, sasa ni chama cha tatu kwa ukubwa nchini.
'Kura ambazo hazijahesabiwa'
Chama hicho kinasema tayari kilikuwa kimeandikisha pingamizi kubwa dhidi ya uhalali wa uchaguzi wa Mei kabla ya matokeo kutangazwa.
Hati ya kiapo ya Mratibu wake wa Kitaifa, Nathi Nhleko, ilidai mchakato wa uchaguzi ulikuwa na dosari na "makosa makubwa ya upigaji kura" na kwamba "zaidi ya kura milioni tisa haziwezi kuhesabiwa."
Chama kingine cha upinzani cha African Transformation Movement (ATM) pia kimewasilisha karatasi katika Mahakama ya Uchaguzi ikiitaka mahakama hiyo ya kitaalam kutengua uchaguzi wa Mei 29 na kuagiza urudiwe.
Chama hicho kinadai kulikuwa na "hesabu potofu, wizi wa kura, na ufisadi" na kwamba uchaguzi haukuwa huru na wa haki.
Mipango ya kuapishwa inaendelea
Hii ni licha ya Tume ya Uchaguzi (IEC) kutangaza uchaguzi mkuu wa 2024 kuwa huru na wa haki mnamo Juni 2.
Hata hivyo, tofauti na chama cha MK, ATM ilishiriki katika kikao cha kwanza cha Bunge, ambacho kilishuhudia uchaguzi wa Spika, Naibu Spika na Rais.
ANC na vyama vingine vya muungano havijatoa maoni yoyote kuhusu maendeleo haya.
Wakati huo huo, Afrika Kusini imetangaza kuapishwa kwa rais mteule, Cyril Ramaphosa, siku ya Jumatano, Juni 19, katika Majengo ya Muungano mjini Pretoria.
