Shirika la Umoja wa Mataifa la kuhudumia wakimbizi lilisema siku ya Jumanne linapanua mpango wake wa msaada wa Sudan hadi Libya na Uganda, baada ya kuongezeka kwa watu wanaokimbia vita vya wenyewe kwa wenyewe vya miezi 14 katika nchi hizo.
Sudan tayari ndio mzozo mbaya zaidi wa wakimbizi duniani huku takriban milioni 12 wakilazimika kuyahama makazi yao na zaidi ya milioni 2 wamelazimika kuvuka mipaka. Upanuzi wa hivi punde wa mpango wa Un kuhudumia wakimbizi unafikisha saba idadi ya nchi za Kiafrika zinazochukua idadi kubwa ya wakimbizi wa Sudan.
Idadi kubwa inayowasili nchini Libya, kaskazini-magharibi mwa Sudan, inaongeza matarajio kwamba wakimbizi hao wanaweza kuendelea na safari yao kuelekea Ulaya kupitia njia hatari ya Bahari ya Mediterania - hali ambayo mkuu wa UNHCR tayari ameonya iwapo msaada hautatolewa.
Hati ya mipango ya UNHCR iliyochapishwa Jumanne ilionyesha kuwa shirika hilo linatarajia kupokea 149,000 nchini Libya kabla ya mwisho wa mwaka. Inapanga 55,000 kwa Uganda ambayo haishiriki mpaka wa moja kwa moja na Sudan na tayari inawahifadhi wakimbizi milioni 1.7 na wanaotafuta hifadhi kutoka kwa majanga mengine.
"Inazungumza tu juu ya hali ya kukata tamaa ambayo watu wamefikia, kwamba wanaishia mahali kama Libya ambayo bila shaka ni ngumu sana, ngumu sana kwa wakimbizi hivi sasa," Ewan Watson wa UNHCR aliwaambia waandishi wa habari huko Geneva, akisema wengi walikuwa wamefika hapo kutoka Darfur ambako vurugu za kikabila zimeongezeka.
Takriban wakimbizi 20,000 tayari wamewasili Libya tangu mwaka jana, huku wanaowasili wakiongezeka kwa kasi katika miezi ya hivi karibuni na maelfu ya wengine bila kusajiliwa, aliongeza Watson. Takriban wakimbizi 39,000 wa Sudan wamewasili Uganda tangu vita hivyo, alisema.
