Chama cha Rais mteule wa Liberia Joseph Boakai kilitangaza Jumanne kuwa kinaghairi sherehe zote za ushindi zilizosalia, siku moja baada ya mamlaka kusema dereva aliingia kwa kasi kwenye umati wa watu na kuua takriban watu watatu na kuwajeruhi wengine 17.
"Maombi yetu na rambirambi zinaenda kwa familia na marafiki walioathiriwa na kitendo hiki kibaya, kiovu na cha kinyama cha ugaidi wa nyumbani, na kusababisha kupoteza maisha ya thamani," chama cha Unity Party cha Boakai kilisema katika taarifa yake.
"Tunaziomba mamlaka kufanya uchunguzi wa kina na wa uwazi ili kubaini sababu na kuwawajibisha waliohusika," iliongeza.
Wafuasi waliokuwa wakisherehekea
Mamlaka zinasema dereva wa gari aina ya jeep bila namba za leseni alizima taa za gari hilo na kugonga kwa makusudi mkusanyiko wa wafuasi wa Unity Party waliokuwa wakisherehekea matokeo ya mwisho ya marudio ya uchaguzi wa urais wa Novemba 14.
Kulingana na Tume ya Kitaifa ya Uchaguzi, Boakai alishinda kwa 50.64% ya kura za raundi ya pili huku Rais aliye madarakani George Weah akipata 49.36%.
Weah alikuwa tayari amekubali kushindwa siku kadhaa mapema kulingana na kutolewa kwa matokeo ya muda, na kuwataka wafuasi wake kuheshimu matokeo ya kura.
Kuchochea vurugu
Serikali iliyoko madarakani Jumanne ilituma salamu zake za rambirambi kwa familia za waathiriwa.
Lakini katika taarifa ya habari iliwataka umma "kujiepusha kutoa madai ambayo hayana uthibitisho kuhusu tukio hilo, ambalo lina uwezekano wa kuchochea ghasia za baada ya uchaguzi."
"Serikali inazingatia mahususi taarifa ya Chama cha Unity, ambayo inaonekana kuwa imefikia hitimisho, kwa kutaja tukio hilo kama ugaidi wa nyumbani na wakati huo huo ikiwataka polisi kuchunguza sababu ya tukio hilo," taarifa ya habari ilisema.
