Usitishaji mapigano wa Sudan umeongezwa kwa siku tano na pande zinazo pigana kuchukua udhibiti wa nchi hiyo baada ya wapatanishi wawili wa kimataifa kueleza wasiwasi wao kuhusu ukiukaji wa mara kwa mara wa mapatano, shirika la habari la AFP linaripoti.
Kuongezwa kwa muda wa kusitisha mapigano kati ya jeshi la Sudan na mpinzani wake, Kikosi cha Msaada wa Haraka cha kijeshi, kilitangazwa katika taarifa ya pamoja Jumatatu jioni na Saudi Arabia na Marekani.
Makubaliano ya mwisho ya kusitisha mapigano yalikuwa yametangazwa wiki moja iliyopita ili kuruhusu misaada inayohitajika sana na kuruhusu raia kukimbia.
Lakini kufikia siku ya saba ya kusitisha mapigano, hakuna njia za kibinadamu zilizokuwa zimehifadhiwa, huku pande zote mbili zikilaumu nyingine kwa ukiukaji wa makubaliano.
Marekani na Saudi Arabia zimekuwa zikipatanisha mazungumzo kati ya jeshi na RSF katika mji wa bandari wa Saudia wa Jeddah. Kufikia sasa, kumetangazwa kusitisha mapigano saba, ambayo yote yamekiukwa.
Katika taarifa hiyo, Marekani na Saudi Arabia zilibainisha kuwa wanajeshi waliendelea kufanya mashambulizi ya anga, huku RSF ikiwa bado inazikalia makazi ya watu na kunyakua mali.
Mzozo wa Sudan, ulioanza Aprili 15, umewakosesha makazi karibu watu milioni 1.4, wakiwemo milioni 1 wa ndani na 330,000 ambao wamevuka na kuingia nchi jirani, kulingana na Ofisi ya Umoja wa Mataifa ya Kuratibu Masuala ya Kibinadamu.
