Mawakili wa Kenya wamechukua hatua ya kuzuia mpango wa kutumwa kwa polisi nchini Haiti, kulingana na jalada la mahakama, siku chache kabla ya maafisa kutarajiwa kuwasili katika taifa hilo la Karibea kukabiliana na ghasia zinazoendelea huko.
Mahakama Kuu mnamo Ijumaa iliamuru kesi hiyo ipelekwe kwa maafisa wakuu wa serikali na kwamba kesi hiyo isikizwe Juni 12, ilisema katika taarifa yake.
Ikijibu ombi la Haiti la usaidizi, Kenya ilijitolea Julai iliyopita kutuma maofisa 1,000 nchini Haiti kusaidia kukabiliana na mzozo wa usalama unaozidi kuwa mbaya ambapo udhibiti wa magenge umewatumbukiza mamilioni katika mgogoro wa kibinadamu.
Hata hivyo, Mahakama Kuu ya Kenya iliamua mwezi Januari kwamba maafisa hao wa polisi wasingeweza kutumwa Haiti kutokana na kukosekana kwa "mpango wa maelewano" na serikali mwenyeji.
Rais wa Kenya William Ruto kisha alitia saini mkataba wa usalama na aliyekuwa waziri mkuu wa Haiti wakati huo Ariel Henry mwezi Machi ambao Nairobi ilitarajia kukidhi matakwa ya mahakama na kuruhusu kutumwa kwa polisi hao.
Mawakili Ekuru Aukot na Miruru Waweru, wanaoongoza chama cha upinzani nchini Kenya kiitwacho Thirdway Alliance, walisema katika ombi lao kwa Mahakama Kuu siku ya Alhamisi kwamba washtakiwa wakiwemo Ruto na polisi walikaidi kwa uwazi agizo la mahakama walipotia saini hati ya maelewano na Haiti.
Walisema kuwa serikali itakuwa na kosa la dharau kwa mahakama ikiwa itaendelea na mpango wake wakuwatuma polisi hao.
"Watuma maombi wanafahamishwa kwa uhakika kwamba utumaji maombi uliopingwa unaweza kugeuzwa wakati wowote kuanzia sasa," mawakili walisema kwenye ombi lao.
Msemaji wa Ruto hakujibu mara moja ombi la maoni yake kuhusu ombi hilo.
Serikali ya Kenya ilisema mwezi Machi ilikuwa inasitisha utumaji wanajeshi kufuatia kujiuzulu kwa Henry.
Lakini Ruto alisema baadaye kuwa kuapishwa kwa baraza la mpito nchini Haiti mnamo Aprili 25 kulishughulikia wasiwasi kuhusu pengo la uongozi huko na kwamba Kenya sasa inajadili jinsi ya kuendelea na mpango wake.
Wiki iliyopita, Kamandi ya Kusini ya jeshi la Marekani ilisema wanakandarasi wa kiraia wamewasili Haiti kujenga makao ya kuishi kwa kikosi kinachoongozwa na Kenya.
Jamaica, Bahamas, Barbados, Benin, Chad na Bangladesh pia zimeahidi wafanyakazi katika kikosi hicho.
Serikali za kigeni zimesitasita kushiriki katika misheni hiyo. Raia wengi wa Haiti pia wamekuwa wakihofia uingiliaji kati wa kimataifa baada ya misheni za awali za Umoja wa Mataifa kuacha nyuma janga la kipindupindu na kashfa za unyanyasaji wa kijinsia.
