Wafanyakazi wameopoa miili 12 kufuatia maporomoko ya ardhi yaliyoikumba barabara magharibi mwa Cameroon, afisa wa eneo alisema siku ya Jumamosi, na kuongeza kuwa hakuna matumaini ya kupata manusura.
Televisheni ya serikali CRTV iliripoti maoni ya gavana wa mkoa wa Ouest, Augustine Awa Fonka.
"Kwa maoni yetu hakuna uwezekano tena wa kupata manusura," aliambia kituo hicho
Miili 12 ilikuwa imepatikana kutoka eneo la maafa, ya mwisho kati yao Jumamosi asubuhi, aliongeza.
Utafutaji unaendelea
Watu wengi zaidi bado hawajulikani walipo, na utafutaji wa miili bado unaendelea, aliongeza.
Maporomoko mawili ya ardhi yaligonga barabara ya Dschang cliff siku ya Jumanne - ya pili wakati wafanyikazi wa dharura walikuwa wakitumia mashine nzito kujaribu kusafisha barabara.
Magari yaliyogongwa ni pamoja na mabasi matatu yenye viti takriban 20 kila moja, magari matano ya kubeba watu sita na pikipiki kadhaa alisema Awa Fonka katika taarifa yake ya awali.
Barabara za Kamerun ni hatari sana, na karibu vifo 3,000 kila mwaka katika ajali, au zaidi ya vifo 10 kwa kila wakaazi 100,000, kulingana na takwimu za hivi punde za Shirika la Afya Ulimwenguni, zilizochapishwa mnamo 2023.
Mapema Septemba, trekta-trela lililokuwa limebeba abiria lilitumbukia kwenye barabara ya miamba kwenye bonde karibu na mji wa Dschang, na kuua watu wanane na wengine 62 kujeruhiwa, wakiwemo watoto wanane.
