Dowladda Federaalka Soomaaliya iyo Jamhuuriyadda Suudaan ayaa kala saxiixday heshiis laba geesood ah oo lagu laalayo dal-ku-galka oo u gaar ah mas’uuliyiinta iyo diblomaasiyiinta haysta baasaboorrada diblomaasiyadeed ee labada waddan.
Heshiiskan ayaa lagu gaaray kalfadhigii labaad ee Guddiga Wadatashiga Siyaasadeed ee Soomaaliya iyo Suudaan oo dhacay 2-dii bishan Abriil.
Tallaabadan ayaa lagu qeexay mid muhiim u ah xoojinta xiriirka laba-geesoodka ah iyo fududeynta wada-shaqeynta diblomaasiyadeed ee Muqdisho iyo Khartuum.
Kulanka lagu saxiixay heshiiska ayaa waxaa si wadajir ah u shir-guddoominayay Xoghayaha Joogtada ah ee Wasaaradda Arrimaha Dibadda Soomaaliya, Xamse Aadan Xaadow, iyo dhiggiisa Suudaan, Danjire Muawiya Cismaan Khaalid.
Sida lagu sheegay bayaan kasoo baxay kulanka, labada dhinac ayaa sidoo kale diiradda saaray horumarinta iskaashiga dhinacyada siyaasadda, dhaqaalaha, waxbarashada, iyo kobcinta awoodda hay’adaha, iyadoo hoosta laga xarriiqay muhiimadda ay leedahay in la xoojiyo isku-duwidda arrimaha gobolka iyo kuwa caalamiga ah.
Kor u qaadista awoodda Baasaboorka Soomaaliya
Heshiiskan lala galay dalka Suudaan ayaa qayb ka ah olole ballaaran oo ay Wasaaradda Arrimaha Dibadda Soomaaliya ku kordhinayso qiimaha iyo awoodda socdaalka ee baasaboorka diblomaasiga ah ee dalka, si loo fududeeyo dhaqdhaqaaqa mas’uuliyiinta qaranka.
Dowladda Soomaaliya ayaa horay heshiisyo noocan oo kale ah oo u oggolaanaya socdaal fiiso la’aan ah (ee baasaboorka diblomaasiga) la gashay 11 dal oo dhaca qaaradaha Afrika iyo Aasiya, kuwaas oo kala ah Tansaaniya, Ugaanda, Aljeeriya, Liibiya, Tuniisiya, Muritaaniya, Masar, Azarbayjaan, Marooko, Indooniisiya, iyo Baakistaan.
