Ugu yaraan 450 qof ayaa hal maalin gudaheed ka barakacay tuulo ku taalla gobolka Waqooyiga Kordofan ee Suudaan, xilli xaaladda amni ay sii xumaanayso, sida ay Isniintii sheegtay Hay’adda Caalamiga ah ee Socdaalka (IOM).
Kooxaha IOM ee ku sugan goobta ayaa qiyaasay in 450 qof ay Axaddii ka qaxeen tuulada Al-Gardud Abu Zeid ee degmada Al-Rahad, sida ay hay’adda Qaramada Midoobay bayaan ku sheegtay.
Qoysaska barakacay ayaa magangelyo u raadsaday degmada Um Rawaba, oo sidoo kale ku taalla Waqooyiga Kordofan, ayay hay’addu intaas ku dartay.
Hay’addu waxay sheegtay in xaaladdu ay weli tahay mid kacsan oo aan degganayn, iyadoo intaas ku dartay inay si dhaw ula socoto xaaladaha soo kordhaya.
Dhawr tuulo oo ku yaalla Waqooyiga Kordofan ayaa maalmihii la soo dhaafay waxaa weerarro ku qaaday Ciidamada Gurmadka Degdegga ah (RSF), kuwaas oo sababay dhimasho iyo boob hantiyeed, sida ay sheegeen ilo maxalli ah.
Axaddii, Shabakadda Dhakhaatiirta Suudaan ayaa RSF ku eedeysay inay shan qof ku dileen weerar ay ku qaadeen deegaannada Al-Qaa iyo Al-Kukaiti ee galbeedka magaalada Bara, isla markaana ay barakiciyeen in ka badan 3,000 oo qof.
Kooxda Gurmadka Degdegga ah ee Dar Hamar, oo ah koox gurmad oo maxalli ah, ayaa sidoo kale Sabtidii sheegtay in afar qof lagu dilay weerar ay RSF ku qaadeen Al-Qaa iyo tuulooyin ku yaalla galbeedka Bara.
Saddexda gobol ee Kordofan Waqooyi, Galbeed iyo Koonfur, ayaa waxaa tan iyo Oktoobar 2025 ka socday dagaallo u dhexeeya ciidanka iyo RSF.
Suudaan waxaa tan iyo Abriil 2023 ka socda dagaal u dhexeeya ciidanka suudaan iyo RSF. Colaadda ayaa dishay tobannaan kun oo qof, waxaana ku barakacay ku dhawaad 13 milyan oo qof, sida ay muujinayaan qiyaasaha Qaramada Midoobay iyo hay’adaha caalamiga ah.
