Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa maanta gaaray magaalada Belgrade ee caasimadda Serbia, halkaas oo uu hoggaaminayo wafdiga Soomaaliya ee ka qaybgalaya Shir Heer Sare ah oo ay yeelanayaan Dhaqdhaqaaqa Dalalka Aan Isbahaysiga Ahayn (NAM), kaas oo 1-da ilaa 2-da Sebtembar 2026 ka dhacaya magaalada Belgrade.
Madaxweynaha ayaa markii uu gaaray Belgrade waxaa soo dhoweeyay mas’uuliyiin sare oo ka tirsan dowladda Serbia, waxaana la filayaa in uu qaabilo Madaxweynaha Jamhuuriyadda Serbia, Aleksandar Vučić.
Wafdiga Soomaaliya waxaa sidoo kale ka tirsan Wasiirka Arrimaha Dibadda iyo Iskaashiga Caalamiga ah, Mudane Cabdisalaam Cabdi Cali, oo isaguna horay maanta u gaaray Belgrade.
Ka-qaybgalka Soomaaliya ee shirka oo uu hoggaaminayo Madaxweynaha Jamhuuriyadda ayaa dib u xaqiijinaya sida Soomaaliya uga go’an tahay mabaadi’da aasaasiga ah ee Dhaqdhaqaaqa Dalalka Aan Isbahaysiga Ahayn, kuwaas oo ay ka mid yihiin ilaalinta madaxbannaanida dalalka, dhowrista midnimada dhuleed iyo in khilaafaadka lagu xalliyo si nabadeed.
Inta uu shirka socdo, Madaxweynaha ayaa la filayaa inuu soo bandhigo mowqifyada Soomaaliya ee ku aaddan arrimaha looga hadlayo shirka, sidoo kalena uu kulamo laba geesood ah la yeesho madax iyo mas’uuliyiin ka socda dalalka kale ee ka qaybgalaya shirka.
