Wasiirka Arrimaha Dibadda Turkiga Hakan Fidan iyo dhiggiisa Iiraan Abbas Araghchi ayaa ka wada hadlay xaaladdii ugu dambeysay ee geeddi-socodka wada-hadallada lala leeyahay Mareykanka.

Labada wasiir ayaa yeeshay wada hadal dhanka telefoonka ah xilli warbaahinta Iiraan ay sheegtay in Mareykanku uusan sameyn wax tanaasul muuqda ah jawaabtiisii ugu dambeysay ee ajandaha ay Tehran soo jeedisay.

Wakaaladda wararka ee Fars ayaa sheegtay in Washington ay soo bandhigtay liis ka kooban shan qodob, oo ay ku jirto dalab ah in Iiraan ay hal goob oo nukliyeer ah oo keliya sii shaqeysiiso isla markaana ay kaydkeeda uranium-ka si heer sare ah loo kobciyay ugu wareejiso Mareykanka.

Waxaa sidoo kale la sheegay in Washington ay diiday inay sii deyso “xitaa 25 boqolkiiba” hantida Iiraan ee la xayiray ama ay bixiso magdhowga khasaaraha dagaalka.

Mareykanka ayaa shardi uga dhigay joojinta colaadaha dhammaan jihooyinka in la bilaabo wada-hadallo.

Warbaahinta Iiraan ayaa ku doodday in Mareykanku uu doonayo tanaasullo uu ku guuldareystay inuu helo xilligii dagaalka socday, taas oo sababtay ismariwaa.

Soo jeedinteeda, Iiraan waxay ku baaqday in la joojiyo dagaalka dhammaan jihooyinka—oo ay ku jirto Lubnaan—iyo in la soo afjaro go’doominta badda ee Mareykanka.

Tehran ayaa sidoo kale adkaysay inay sii wadi doonto maareynta marin-biyoodka istaraatiijiga ah ee Hormuz.

Xiisadaha gobolka ayaa cirka isku shareeray tan iyo markii Mareykanka iyo Israa’iil ay weerarro ku qaadeen Iiraan bishii Febraayo.

Inkasta oo xabbad-joojin ay dhaqan gashay tan iyo 8-dii Abriil, afhayeenka ciidamada qalabka sida ee Iiraan Abolfazl Shekarchi ayaa Axaddii uga digay Donald Trump inuu dib u bilaabo weerarrada.

“Madaxweynaha quusta qaba ee Mareykanka waa inuu ogaadaa in haddii hanjabaadihiisa la fuliyo... kheyraadka iyo militariga dalkiisa ay wajihi doonaan xaalado aan horay loo arag, weerarro leh, lama filaan ah oo qalalaase wata,” ayuu yiri.