Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa kulan laba geesood ah la yeeshay Madaxweynaha Jamhuuriyadda Serbia, Aleksandar Vučić, iyaga oo ku kulmay dhinacyada Shirka Heerka Sare ee Xuska 65-guurada Shirkii Koowaad ee Dalalka Aan Isbahaysiga Ahayn, kaas oo ka dhacay magaalada Belgrade.
Madaxweyne Xasan Sheekh Maxamuud, oo uu wehelinayay Wasiirka Arrimaha Dibadda iyo Iskaashiga Caalamiga ah, Cabdisalaam Cabdi Cali, iyo Madaxweyne Aleksandar Vučić ayaa ka wada hadlay xiriirka soo jireenka ah ee Soomaaliya iyo Serbia, waxayna ku heshiiyeen in la xoojiyo xiriirka laba geesoodka ah lana ballaariyo iskaashiga dhinacyada amniga, dhaqaalaha iyo maalgashiga.
Soomaaliya, oo ka mid ahayd 25-kii dal ee ka qaybgalay Shirkii Koowaad ee Dalalka Aan Isbahaysiga Ahayn ee lagu qabtay Belgrade sannadkii 1961, ayaa mar kale xaqiijisay sida ay uga go'an tahay iskaashiga dhinacyada badan iyo ballaarinta iskaashigeeda caalamiga ah.
Madaxweynaha ayaa sidoo kale wadahadallo la yeeshay Sahiba Gafarova, Guddoomiyaha Baarlamaanka Milli Majlis ee Azerbaijan. Labada dhinac ayaa ka wada hadlay xoojinta xiriirka laba geesoodka ah iyo iskaashiga.
Madaxweyne Xasan Sheekh Maxamuud ayaa sidoo kale wadahadallo miro-dhal ah la yeeshay Madaxweynaha Ghana, John Dramani Mahama, iyaga oo ku kulmay dhinacyada Shir-madaxeedka NAM65 ee magaalada Belgrade, Serbia.
Labada hoggaamiye ayaa is-weydaarsaday aragtiyo ku saabsan xoojinta xiriirka laba geesoodka ah ee Soomaaliya iyo Ghana, ballaarinta iskaashiga dhinacyada ay wadaagaan danaha, iyo horumarinta mudnaanta ay wadaagaan ee nabadda, horumarka iyo barwaaqada guud ahaan Afrika.
