Dal ahaan Suuriya oo ka caaggan argagixiso iyo maleeshiyooyin, isla markaana ah hal qaran oo midaysan, ayaa ah "dammaanadda ugu xooggan" ee lagu ilaalin karo xuduudaha ay la wadaagto Turkiga, sida uu caddeeyay Wasiirka Arrimaha Dibadda Suuriya, Asaad Xasan Al-Shaybaani.
Wasiir Al-Shaybaani ayaa hadalladan ka jeediyay shir jaraa'id oo uu si wadajir ah ula qabtay dhiggiisa Wasiirka Arrimaha Dibadda Turkiga, Hakan Fidan, kaas oo Khamiistii ka dhacay caasimadda Ankara.
Shirkaas jaraa'id dhexdiisa, ayuu Wasiir Fidan ku sheegay in weerarrada Israa'iil ee gudaha Suuriya ay kamid yihiin khataraha ugu waaweyn ee ku wajahan xasilloonida dalkaas, wuxuuna ku eedeeyay xukuumadda Israa'iil inay sii hurinayso colaadaha iyo degganaansho la'aanta ka taagan guud ahaan gobolka.
Isagoo ka falcelinaya heshiiskii dhowaan la gaaray ee lagu dhaqaajinayo qorshaha nabadda ee marinka Qaza, Fidan ayaa xusay in weerarrada isdaba-joogga ah ee Israa'iil "ay mar kale si cad u muujiyeen in (Ra'iisul Wasaaraha Israa'iil Benjamin) Netanyahu uusan doonayn nabad."
Dhankiisa, Al-Shaybaani ayaa sheegay in xukuumadaha Dimishiq iyo Ankara ay ka shaqeynayaan sidii loo dhisay Golaha Iskaashiga Istaraatiijiga ah ee Heerka Sare, si loo xoojiyo wada-shaqaynta arrimaha ay wadaagaan, loona ballaariyo iskaashiga dhinacyada kala duwan.
Wasiirka Suuriya ayaa sidoo kale si weyn u soo dhaweeyay mashruuca waddada tareenka ee qorsheysan inuu isku xiro dalalka Suuriya, Turkiga, Urdun iyo Sucuudi Carabiya, isagoo ku tilmaamay inuu noqon doono buundo muhiim ah oo isku xirta dhinacyada juquraafiga, dhaqaalaha iyo diblumaasiyadda ee afartan waddan.
Isagoo xusay in la-dagaallanka argagixisadu uu yahay udub-dhexaadka diblumaasiyadda labada dal, Al-Shaybaani wuxuu sheegay in Suuriya ay haatan qaadayso tallaabooyin la taaban karo oo lagu xoojinayo awoodda dowladnimo, iyadoo la burburinayo kooxaha hubeysan ee sharci-darrada ah.
"Kani waa maalgashiga ugu weyn ee lagu samaynayo amniga dalalka deriska ah. Suuriya oo mid ah, kana caaggan argagixiso iyo maleeshiyooyin, waxay dhisaysaa darbiga amni ee ugu adag si loo ilaaliyo xuduudaha aan la wadaagno (Turkiga)," ayuu yiri.
Wuxuu intaas ku daray in Turkiga iyo Suuriya ay sii wadayaan isku-duwidooda iyagoo ku salaynaya danaha qaranka ee ay wadaagaan, isagoo ugu baaqay dhammaan dalalka gobolka inay sii qotomiyaan iskaashigooda dhinacyada milatariga, dhaqaalaha iyo siyaasadda.
Weerarrada Israa'iil iyo xiisadda gobolka
Wasiir Al-Shaybaani ayaa si adag u cambaareeyay weerarrada joogtada ah ee Israa'iil ay ku qaaddo koonfurta Suuriya, isagoo sheegay inay beegsanayaan madax-bannaanida dalka iyo midnimadiisa dhuleed, iyagoo dhinaca kalena khatar ba'an gelinaya xasilloonida gobolka.
"Waxaan ku celinaynaa baaqeenna ku aaddan in dib loogu laabto Heshiiskii Kala-qaadista Ciidamada ee 1974-kii, iyo in Israa'iil ay dib uga gurato oo ay ka baxdo xariiqyadii ay haysatay ka hor 8-dii Diseembar 2024. Waxaan ugu baaqaynaa beesha caalamka inay dhowrto sharciga caalamiga ah, kana qaybqaadato ilaalinta xasilloonida Suuriya iyo guud ahaan gobolka," ayuu carrabka ku adkeeyay Al-Shaybaani.
Wasiirka ayaa caddeeyay in dadaallada xasilinta dhinaca waqooyi ee Suuriya ay si xooggan u socdaan, halka hindisayaal diblumaasiyadeedna lagu raadinayo sidii loo joojin lahaa weerarrada Israa'iil ay ka waddo koonfurta dalkaas.
Isagoo ka hadlayay dagaalka Mareykanka iyo Israa'iil ay ku qaadeen Iiraan, wuxuu carabka ku adkeeyay baahida degdegga ah ee loo qabo in dagaalkaas uu joogsado, isagoo xusay in xiisadda sii kordhaysa ee gobolka ay sidoo kale saamayn xun ku yeelatay gudaha Suuriya.
Gaba-gabadii, Wasiirka Arrimaha Dibadda Suuriya ayaa sidoo kale si adag u cambaareeyay weerarrada ay Iiraan ku qaadday dalalka Khaliijka, arrintaas oo muujinaysa mowqifka xukuumadda Dimishiq ee ku aaddan isbeddellada ammaan ee ka taagan Bariga Dhexe.
