Ra’iisul Wasaaraha Dawladda Federaalka Soomaaliya, Xamza Cabdi Barre, ayaa wadahadallo la yeeshay Ra’iisul Wasaare Ku-xigeenka ahna Wasiirka Difaaca Qatar, Sheekh Saud bin Abdulrahman bin Hassan Al Thani, taas oo qayb ka ahayd kulamada rasmiga ah ee uu la yeelanayo madaxda sare ee Qatar.

Kulanka ayaa diiradda lagu saaray xoojinta iskaashiga labada dal ee dhinacyada amniga iyo difaaca, iyo horumarinta xasilloonida gobolka iyo tan caalamka, iyadoo si gaar ah xoogga loo saaray iskaashiga lagula tacaalayo khatarta sii kordheysa ee argagixisada isaga gudubta xuduudaha.

Ra’iisul Wasaare Xamza ayaa dhiggiisa Qatar uga warbixiyay horumarka Soomaaliya ka sameysay sugidda amniga magaalooyinka waaweyn iyo hawlgallada milatari ee socda ee ka dhanka ah Al-Shabaab.

Sheekh Saud, oo Ra’iisul Wasaaraha ku booqday hoyga uu ka deggen yahay Doha, ayaa xaqiijiyay taageerada Qatar ee Soomaaliya, wuxuuna muujiyay sida dowladdiisu diyaar ugu tahay inay sii ballaariso iskaashiga labada dal ee dhinacyada kala duwan.

Ra’iisul Wasaare Xamza ayaa dowladda Qatar uga mahadceliyay soo dhaweynta diirran ee loo sameeyay isaga iyo wafdigiisa, isagoo bogaadiyay heerka wanaagsan ee xiriirka labada dal. Wuxuu sidoo kale Qatar uga mahadceliyay taageerada joogtada ah ee ay siiso madax-bannaanida Soomaaliya, gaar ahaan xilliyadii dalku wajahayay caqabado dibadeed oo ku saabsan midnimada dhuleed.