Golaha Dastuurka dalka Jabuuti ayaa maalintii Talaadada si rasmi ah u xaqiijiyay in Madaxweyne Ismaaciil Cumar Geelle uu ku guuleystay doorashadii madaxtinimada markii lixaad oo xiriir ah, isagoo helay natiijo kama dambays ah oo gaaraysa 97.01% codadkii la dhiibtay.
Madaxweyne Geelle oo ah 78 jir, ayaa dalkan muhiimadda istaraatiijiyadeed ku leh Geeska Afrika maamulayay tan iyo sannadkii 1999-kii.
Natiijooyinkii hordhaca ahaa ee soo baxay saacado un kaddib codayntii dhacday 10-kii bishan Abriil, ayaa muujinayay in uu helay 97.81%, isagoo ka guuleystay hal musharrax oo kaliya oo la tartamayay.
Wakaaladda Wararka Rasmiga ah ee Jabuuti, iyadoo soo xiganaysa xogta Golaha Dastuurka, ayaa shaacisay in Madaxweyne Geelle uu helay wadarta codad gaaraya 204,874.
Sidoo kale, wakaaladda ayaa xustay in musharraxii kaliya ee la tartamayay oo ahaa Maxamed Faarax Samatar, uu isna helay 6,318 cod, taas oo u dhiganta 2.99% wadarta guud ee codadkii la dhiibtay.
Jabuuti ayaa xuduud la leh marinka Baabul-Mandab, kaas oo laga galo Badda Cas marka laga yimaado Gacanka Cadmeed, waana marin ay marto qayb weyn oo ka mid ah ganacsiga isku xira qaaradda Aasiya iyo waddamada Reer Galbeedka.
Dalka Jabuuti oo ay ku nool yihiin dad tiradoodu wax yar ka badan tahay hal milyan oo qof, ayaa ka faa’iidaystay dhulkiisa iyo goobta uu ku yaallo, isagoo isku beddelay xudun caalami ah oo u adeegta saldhigyada milatari ee shisheeyaha iyo isku-socodka baddaha caalamka
