Wasaaradda Waxbarashada ee Soomaaliya ayaa magaalada Nairobi heshiis is-afgarad ah kula saxiixatay Jaamacadda Kenyatta ee dalka Kenya, si loo ballaariyo iskaashiga dhinacyada tacliinta sare, cilmi-baarista, iyo awood-dhiska hay’adaha ee labada dal.
Heshiiskan ayaa diiradda saaraya barnaamij deeq waxbarasho oo heerka labaad ee Master’s-ka ah, kaas oo la siinayo 250 gabdhood oo Soomaaliyeed. Wasaaradda Waxbarashada Soomaaliya ayaa si buuxda u maalgelinaysa kharashka ardaydan.
Sida uu dhigayo heshiiska, Jaamacadda Kenyatta ayaa bixin doonta adeegga waxbarashada iyo nidaamka tacliinta, halka Jaamacadda Ummadda Soomaaliyeed ay martigelin doonto fulinta barnaamijka.
Iskaashiga u dhexeeya labadan hay’adood ayaa sidoo kale waaxa ka mid ah qabashada shirar aqooneed, cilmi-baaris wadajir ah, iyo wadaagga qalabka tignoolajiyada. Qorshahan ayaa waxaa sidoo kale ku jira abuurista tababarro iyo barnaamijyo layli-shaqo oo kor u qaadaya xirfadaha shaqo ee ardayda.
Heshiiska ayaa waxaa dhanka Soomaaliya u saxiixay Xoghayaha Joogtada ah ee Wasaaradda Waxbarashada, Xasan Maxamed Cali, halka dhanka Jaamacadda Kenyatta uu wakiil ka ahaa Paul Wainaina. Saxiixa heshiiska ayaa waxaa goobjoog ka ahaa wafdi ka socday Jaamacadda Ummadda Soomaaliyeed oo uu hoggaaminayay Guddoomiye Ku-xigeenka Jaamacadda, Fu’aad Mire Xasan.
