Maamulka Gobolka Banaadir ayaa bilaabay wejiga koowaad ee barnaamij dib-u-dejin ah oo loogu talagalay qoysaska ay saameeyeen dib-u-habeynta ka socota deegaannada aan rasmiga ahayn ee magaalada Muqdisho.
Duqa Muqdisho ahna Guddoomiyaha Gobolka Banaadir, Dr. Xasan Maxamed Xuseen Muungaab, ayaa kormeer uu ku tagay goobta loo qoondeeyay degmada Gubadley ku sheegay in halkaas dib loo dejin doono in ka badan 1,000 qoys.
Deegaanka cusub ayaa loo qorsheeyay adeegyada aasaasiga ah ee bulshada, oo ay ka mid yihiin biyo nadiif ah, koronto, masaajid, xarun caafimaad, suuq iyo dugsi dadweyne. Barnaamijka ayaa looga gol leeyahay in qoysaska la siiyo deegaan ammaan badan oo si wanaagsan loo qorsheeyay.
Duqa Muqdisho ayaa sheegay in barnaamijku sii socon doono, laguna ballaarin doono degmooyinka kale ee maamulku ka helay dhul lagu dejin karo qoysas dheeraad ah.
Barnaamijkan ayaa qayb ka ah dadaallada dawladda ee lagu horumarinayo qorsheynta magaalada, laguna xaqiijinayo in qoysaska ay arrintani saameysay ay helaan hoy ku habboon iyo adeegyada aasaasiga ah.
