Nigeria don call for stronger cooperation among Commonwealth nations on peace and security, trade, climate resilience, democratic governance and youth empowerment.

Dis na part of wetin di country dey expect from di Commonwealth at di 2026 Commonwealth Heads of Government Meeting (CHOGM) for St John's, Antigua.

Di Minister of Foreign Affairs, Ambassador Bianca Odumegwu-Ojukwu, make di call during her interventions at di summit wey just end, and she stress say member states need to pursue shared interests and values despite di changing global geopolitical realities.

According to one statement wey dem issue on Monday for Abuja by di Minister Special Assistant on Communication and New Media, Dr Magnus Eze, di minister emphasise say di Commonwealth must move pass shared commitments go practical actions wey go address di challenges wey dey face its member nations.

She identify fighting terrorism, expanding access to development finance and strengthening collective security as key priorities wey need renewed attention.
 
On democratic governance, Odumegwu-Ojukwu draw attention to Naija preparations for its January 2027 general elections, and she urge di Commonwealth to prioritise credible electoral processes through election observation missions and stronger democratic institutions.
 
She talk say Naija, under President Bola Ahmed Tinubu, still dey committed to promoting civil, political and social rights, while upholding di rule of law and judicial independence as important pillars of transparent and inclusive governance.
 
Di minister also highlight economic cooperation, and she describe di creation of di Commonwealth Trade Portal as welcome development wey fit strengthen commercial ties and open new opportunities for member countries.
 
She note say trade facilitation, better market access and di integration of developing economies into global financial markets go help speed up economic growth across di Commonwealth.