Joseph Tegbe, minister of power, talk say federal government go start to change infrastructure across di national grid within di next one to two months.
Tegbe yarn on Monday during one TVC television programme.

"So in di next one or two months, we go start infrastructure replacement across our grid…. President Tinubu dey support wetin we dey do well well," im talk.

Di minister point out say transmission na di biggest problem for di power sector, and note say some of di country transmission lines don dey work for like 50 years.

Tegbe talk say di ministry dey do technical audit of di power sector to find di infrastructure wey need repair or replacement and make sure say money go di right places.
"I be systems person. So do technical audit of di whole power sector. And today, we don go like one month into di technical audit. We don see some of di results," im talk.

Di minister talk say di audit also find faults for plenty facilities.

"Some places na towers get issues. Some places na insulators. Some places na conductor relay," im talk.