Ministan Harkokin Wajen Turkiyya Hakan Fidan ya yi kira da a koma kan yarjejeniyar fahimtar juna da aka sanya wa hannu tsakanin Amurka da Iran, yana mai cewa Qatar tana amfani da dukkan hanyoyin diflomasiyya da ake da su don taimakawa wajen magance rikicin da ke tsakanin ƙasashen biyu sannan Turkiyya na aiki tare da Doha sosai don cim ma hakan.

"Ina farin cikin ganin cewa Qatar na sake ƙoƙarin yin duk abin da za ta iya don magance wannan rikicin ta hanyar amfani da dukkan matakan daidaitawa da kuma hanyoyin da ake da su. Muna fatan za mu samu labari mai daɗi a cikin kwanaki masu zuwa," kamar yadda Fidan ya bayyana a ranar Lahadi a wata hira da Qatar TV ta yi da shi a yayin ziyararsa a ƙasar ta yakin Gulf.

"Kazalika Turkiyya tana da kyakkyawan haɗin kai da Qatar kan wannan batu," in ji shi.

Fidan ya kuma yi gargaɗin cewa rikici tsakanin Amurka da Iran ya matukar shafar tattalin arzikin yankin kuma ya ce haɗarin ɓarkewar rikici mai girma zai iya haifar da ƙarin rashin kwanciyar hankali.

Da yake tunawa da hare-haren da ake kai wa ababen more rayuwa a yankin, ya jaddada buƙatar farfaɗo da ƙoƙarin diflomasiyya.

Masu AlakaTRT Afrika - Masu shiga tsakani suna fafutukar kwantar da tankiya tsakanin Amurka da Iran

"Fatanmu shi ne a sake cim ma yarjejeniya tsakanin Iran da Amurka cikin sauri. Kamar yadda kuka sani, da kokarin shiga tsakani na Pakistan, da gudunmawar da Qatar ke bayarwa da kuma goyon bayan Turkiyya, muka shirya yarjejeniyar fahimtar juna.

"Ko da yake, tuni muka sauka daga kan wannan layi. Amma yanzu muna bukatar mu koma," in ji shi.

"Haɗin kai, ba gasa ba"

Fidan ya ce ya tattauna waɗannan batutuwa a lokacin tarurrukan da aka gudanar a Qatar sannan ya daɗa jaddada goyon bayan Turkiyya ga ƙoƙarin diflomasiyya na Doha.

"Tsaro da zaman lafiyar Qatar, da kuma tsaro da kwanciyar hankali na yankin, suna cikin muradin Turkiyya. Saboda haka, kamar yadda yake a cikin sauran batutuwa da dama, za mu ci gaba da yin aiki tare da ƙasashen Gulf da sauran ƙasashen Musulunci a duniya kan wannan batu," in ji shi.

Fidan ya bayyana Turkiyya da Qatar a matsayin ƙasashe biyu masu dangantaka mai zurfi ta tarihi da kuma haɗin gwiwa mai ƙarfi a fannin dabaru, yana mai cewa an kafa tushen dangantakar ƙasashen biyu ne a lokacin mulkin tsohon Sarkin Qatar Sheikh Hamad bin Khalifa Al Thani, wanda ya rasu a ranar Lahadi da ta wuce.

Da yake yi wa al'ummar Qatar ta'aziyya, Fidan ya ce Sheikh Hamad "ba wai kawai shugaba ne mai hangen nesa ga Qatar ba, har ma ga duniyar Musulunci da ma duniya baki ɗaya."

"Ya bayar da gudummawa mai yawa da kuma tsari mai muhimmanci." A yau, yankinmu da ma wajensa suna ci gaba da amfana daga abin da ya samar," in ji shi.

Fidan ya kuma yaba wa Sarkin Qatar Sheikh Tamim bin Hamad Al Thani saboda rawar da ya taka a yankin da kuma karfafa haɗin gwiwar Turkiyya da Qatar don magance manyan ƙalubalen yankin.

"A yau, mun ga kyakkyawan misalai na haɗin gwiwar Turkiyya da Qatar, tun daga Lebanon zuwa Afghanistan, daga Afghanistan zuwa Sudan, daga Sudan zuwa Gaza, ga kuma batun Falasɗinu da na Iran, sannan ana ƙara yabawa a duk faɗin yankin kuma hakan ya zama abin koyi ga wasu," in ji Fidan.

"Akwai buƙatar haɗin kai na ci gaba maimakon gasa a yankin, kuma Qatar tana yin kokari sosai wajen cim ma wannan burin," in ji shi.

Fidan ya kara da cewa ƙasashen Gulf, musamman Qatar, Saudiyya, Hadaddiyar Daular Larabawa, Kuwait da Oman, sun samu ci gaba mai yawa ta hanyar ci gaba da manyan ayyukan ci gaba da kuma ayyukan jama'a yayin da suke gina kasashe masu karfi da manyan birane a duniya.