'Na fi jin dadin rawar da na taka a matsayin Mainasara a shirin Labarina’
Fitaccen dan wasan Kannywood Sadiq Sani Sadiq ya ce bai taba yin farin-jini ba irin wanda ya samu a shirin ‘Labarina’ mai dogon zango tun da ya soma finafinai.
Ya bayyana haka ne a hira da TRT Afrika Hausa a birnin Kano na Nijeriya.
“Masoyana da yawa sun ma manta da sunana Sadiq Sani Sadiq. Yawanci duk inda nake haduwa da masoyana za ka ji suna cewa Al’amin wasu kuma suna cewa Mainasara. Ba a taba kira na a wayar tarho a kan fim ba kamar wannan (lokaci) na shirin na Labarina ba,” in ji shi.
Ya ce masu kallon shirin su shirya sosai domin kuwa nan gaba akwai karin “nishadi da kayatarwa sannan kuma za a yi kuka sosai.”
Sadiq ya ce duka matan da aka hada shi da su a fim din wato Maryam da Jamila suna “taka rawar da ta dace” kuma ya ji dadin aiki da su.
Ya ce ya fi jin dadin fitowa a matsayin Mainasara “saboda yanayin mutum ne mai kudi matashi” don haka yanayin “yadda na gabatar da kaina, yanayin maganata da tafiyata yadda suka canza. Gaskiya na fi jin dadin lokacin da ya bayyana a matsayin Mainasara" ba Al'amin ba.
Bidiyoyi masu alaka
Har yanzu labarin Presido da Sumayya bai kare ba, in ji Aminu Saira
Daraktan fim din “Labarina” Malam Aminu Saira ya shaida wa TRT Afrika Hausa cewa baya ga labarin Al’amin da Maryam zai sake waiwayar labarin Sumayya da Presido, yana mai cewa akwai abubuwa masu jan hankali da za su faru a cikin shirin nan gaba.
Abin da ya sa na yi wakar ‘Halitta’ – Nazifi Asnanic
Fitaccen mawakin nan na Kanyywood, Nazifi Asnanic, ya ce ya rera wakar ‘Halitta’ ne domin ya ja hankalin jama’a game da muhimmancin halittun Allah. Asnanic ya shaida da TRT Afrika Hausa cewa “duk wani marubuci ana so ya zama mutum mai kirkira, to gaskiya na zauna na yi tunani cewa me zan yi da zai dauki hankali” shi ya sa ya rera wakar ta halitta. Mawakin, wanda kusan daukacin masu ruwa da tsaki a Kannywood ke yi masa kallo a matsayin mutumin kirki, ya ce samun nasararsa na da alaka da saukin kansa inda ya kara da cewa “ba ni da abokin fada”.
‘Ana yawan tambayata addinin da nake yi’
Tauraro a shirin Kwana Casa’in mai dogon zango, John Dan Daso, ya ce mutane suna yawan tambayarsa kan ko shi Musulmi ne ko Kirista. Ya bayyana haka ne a hira ta musamman da TRT Afrika Hausa a birnin Kano na Nijeriya. John Dan Daso, wanda sunansa na ainihi shi ne Waziri Alhaji Salihu Hong, ya ce “Musulmi ne ni gaba da baya. Ina Sallah yadda Musulmai suke yi.” Ya kara da cewa rawar da yake takawa a matsayin Kirista a Kwana Casa’in ta nuna cewa ya gwanance wajen yin aikinsa tun da har wasu suke yi masa kallo a matsayin wanda ba Musulmi ba. Ya yi kira ga masu kallonsu da su rika yi wa ‘yan fim uzuri bisa wasu kura-kurai da suke aikatawa, yana mai cewa kowa yana iya yin kuskure.
