Shirkadda diyaaradaha ee EgyptAir ayaa Arbacadii dib u billowday duullimaadyadii ay ku tagi jirtay Suudaan, iyadoo diyaaraddii ugu horreysay ay ka degtay Garoonka Caalamiga ah ee Port Sudan, kaddib markii duullimaadyada la hakiyay tan iyo bishii May 2025.
Shirkadda Garoomada Diyaaradaha Suudaan ayaa war ay soo saartay ku sheegtay in Garoonka Caalamiga ah ee Port Sudan uu qaabilay diyaaraddii ugu horreysay ee EgyptAir, taasoo calaamad u ah dib u furista duullimaadyada tooska ah ee u dhexeeya Qaahira iyo Port Sudan.
Shirkaddu waxay sheegtay in dib u soo laabashada duullimaadyada tooska ahi ay xoojin doonto isku xirka hawada ee u dhexeeya Suudaan iyo Masar, taageeri doonto howlaha Garoonka Caalamiga ah ee Port Sudan, isla markaana ballaarin doonto fursadaha safarka ee rakaabka.
Waxay intaas ku dartay in dib u soo laabashada EgyptAir ay tirada shirkadaha caalamiga ah ee ka howlgala Garoonka Caalamiga ah ee Port Sudan ka dhigtay shan.
Shirkadaha kale ee caalamiga ah ee hadda ka howlgala garoonka ayaa kala ah Turkish Airlines, Ethiopian Airlines, Qatar Airways iyo SalamAir oo laga leeyahay Cumaan.
Suudaan waxaa tan iyo Abriil 2023 ka socday dagaal u dhexeeya ciidamada dowladda iyo Ciidamada Gurmadka Degdegga ah (RSF), kaddib khilaaf ka dhashay qorshaha lagu dhex darayo RSF ciidamada qalabka sida.
Sida ay Qaramada Midoobay qiyaastay, dagaalka ayaa sababay mid ka mid ah dhibaatooyinka bani’aadannimo ee ugu daran dunida, isagoo dilay tobannaan kun oo qof, kuna barakiciyay ku dhowaad 13 milyan oo kale.
