Guddoomiyaha Golaha Shacabka ee Baarlamaanka Federaalka Soomaaliya, Cabdulqaadir Maxamed Nuur Jaamac, ayaa dowladda iyo shacabka Jamhuuriyadda Turkiga ugu hambalyeeyay munaasabadda 104-aad ee Maalinta Guusha Turkiga oo la xuso 30-ka Agoosto.
Guddoomiyaha ayaa Turkiga ku tilmaamay saaxiib soo jireen ah iyo dal walaal la ah Soomaaliya, isagoo xusay in booqashadii taariikhiga ahayd ee Madaxweyne Recep Tayyip Erdoğan uu Muqdisho ku yimid sannadkii 2011 ay bog cusub u furtay xiriirka labada dal.
Wuxuu sheegay in Turkiga tan iyo xilligaas uu door muhiim ah ka qaatay dib-u-kabashada iyo dib-u-dhiska Soomaaliya, isagoo taageero ka geystay dhinacyada waxbarashada, caafimaadka, kaabeyaasha dhaqaalaha, amniga iyo horumarinta hay’adaha dowladda.
Guddoomiyaha ayaa xusay in xiriirka labada dal uu u gudbay heer iskaashi istiraatiiji ah, kaas oo lagu xoojiyay heshiisyo dhinacyada difaaca, iskaashiga dhaqaalaha iyo arrimo kale oo labada dal muhiim u ah.
Wuxuu sidoo kale adkeeyay in saaxiibtinimada iyo iskaashiga joogtada ah ee Soomaaliya iyo Turkiga ay tiir muhiim ah u sii ahaan doonaan nabadda, xasilloonida iyo horumarka Soomaaliya iyo guud ahaan gobolka Bariga Afrika. Guddoomiye Cabdulqaadir ayaa dowladda iyo shacabka Turkiga u rajeeyay nabad, barwaaqo, horumar iyo guulo waara.
