Madaxweynaha Turkiga Recep Tayyip Erdogan ayaa Jimcaha booqasho shaqo oo hal maalin ah ku tagi doona Sacuudiga, sida uu sheegay Madaxa Isgaarsiinta Madaxtooyada Turkiga Burhanettin Duran.
Inta uu booqashada ku jiro, Erdogan ayaa la filayaa inuu la kulmo Dhaxal-sugaha ahna Ra’iisul Wasaaraha Sacuudiga Mohammed bin Salman iyo Ra’iisul Wasaaraha Pakistan Shehbaz Sharif, ayuu Duran Khamiistii ku sheegay qoraal uu ku baahiyay barta bulshada Turkiga ee NSosyal.
Dhanka kale, Sharif ayaa gaaray Sacuudiga, isagoo bilaabay booqasho saddex maalmood ah oo diiradda lagu saarayo iskaashiga labada dal iyo xaaladaha gobolka.
Wakaaladda wararka rasmiga ah ee Sacuudiga ee SPA ayaa sheegtay in Sharif uu Garoonka Caalamiga ah ee King Abdulaziz ee Jeddah ku soo dhaweeyay Amiir Saud bin Mishaal bin Abdulaziz, oo ah guddoomiye ku-xigeenka gobolka Makkah.
Wakaaladda wararka dowladda Pakistan ee Associated Press of Pakistan (APP) ayaa sheegtay in Sharif ay safarka ku weheliyaan Field Marshal-ka ahna Taliyaha Ciidanka Asim Munir, Ra’iisul Wasaare Ku-xigeenka ahna Wasiirka Arrimaha Dibadda Ishaq Dar iyo mas’uuliyiin kale oo sare.
Sida ay sheegtay APP, Sharif ayaa lagu wadaa inuu Dhaxal-sugaha Sacuudiga Mohammed bin Salman kala hadlo sidii loo xoojin lahaa iskaashiga labada dal, iyo sidoo kale xaaladaha gobolka iyo kuwa caalamka.
Sacuudiga iyo Pakistan ayaa leh xiriir dhow oo dhinaca difaaca ah, kaas oo ku saleysan heshiis difaac oo wadajir ah oo la saxiixay xilli ay gobolka ka jireen xiisado.
Booqashadan ayaa ku soo beegmaysa iyadoo Islamabad ay sii waddo dadaallada dhexdhexaadinta ee u dhexeeya Washington iyo Tehran.
Bishii Juun, Qatar ayaa Pakistan ku biirtay dhexdhexaadinta Mareykanka iyo Iiraan, taasoo horseeday saxiixa is-afgarad 18-kii Juun iyo bilowga wada-xaajoodyo lagu doonayo in lagu gaaro heshiis kama dambeys ah.
Wada-xaajoodyada ayaa markii dambe hakaday sababo la xiriira khilaafyo ku saabsan amniga badda iyo xorriyadda isu socodka marin-biyoodka Hormuz, inkastoo mas’uuliyiin ka kala socda Iiraan, Cumaan iyo Mareykanka ay dhowaan muujiyeen in horumar laga gaarayo xalinta arrimaha weli taagan.
