In ka badan 5,000 oo qof ayaa muddo afar maalmood ah ka barakacay magaalo ku taalla koonfur-bari Suudaan, sababo la xiriira xaaladda amni ee sii xumaanaysa, sida ay Isniintii sheegtay Hay’adda Caalamiga ah ee Socdaalka (IOM).
War-saxaafadeed ay soo saartay hay’adda Qaramada Midoobay ayaa lagu sheegay in kooxaheeda ka hawlgala goobta ay qiyaaseen in 5,355 qof oo ka kooban 1,071 qoys ay ka barakaceen magaalada Qaisan iyo toddobo tuulo oo ku yaalla degmadaas oo ka tirsan gobolka Blue Nile.
Barakaca oo dhacay 12-kii ilaa 15-kii Agoosto, ayaa ka dhashay xaaladda amni ee sii xumaanaysay, ayay hay’addu intaas ku dartay.
Qoysaska ay xaaladdu saameysay ayaa u qaxay deegaanno kale oo ka tirsan Qaisan, iyo sidoo kale degmooyinka Al-Roseires iyo Wad Al-Mahi oo iyaguna ku yaalla gobolka Blue Nile.
Xaaladda deegaanka ayaa weli ah mid kacsan oo aan degganayn, sida ay sheegtay IOM.
11-kii Agoosto, IOM ayaa sheegtay in 2,500 qof, oo ka kooban 500 qoys, ay ka barakaceen Qaisan sababo la xiriira amni darrada sii xumaanaysay iyo isku dhacyada ka dhacay deegaanka.
Isla maalintaas, mas’uuliyiinta Qaisan ayaa sheegay in Ciidanka Suudaan uu iska caabiyay weerar ay magaalada ku soo qaadeen xoogagga RSF iyo Jabhadda Xoreynta Shacabka Suudaan-Waqooyi (SPLM-N) oo xulafo la ah RSF, magaaladaas oo ku dhow xadka Itoobiya.
Ciidanka Suudaan ayaa gacanta ku haya qaybo badan oo ka mid ah gobolka Blue Nile, halka SPLM-N ay dowladda la dagaallamaysay tan iyo 2011, iyadoo dalbanaysa ismaamul loo sameeyo Koonfurta Kordofan iyo Blue Nile labadaba.
Tan iyo bishii Abriil 2023, RSF iyo Ciidanka Suudaan waxaa u dhexeeyay dagaal ka dhashay khilaaf la xiriira qorshaha ciidamada RSF loogu darayo militariga. Dagaalka ayaa dilay tobannaan kun oo Suudaaniyiin ah, wuxuuna barakiciyay ku dhowaad 13 milyan oo qof, isagoo sababay macaluul xilli dalka uu wajahayo mid ka mid ah dhibaatooyinka bani’aadannimo ee ugu daran dunida.
