Dowladda Uganda ayaa ku dhawaaqday in Madaxweyne Yoweri Kaguta Museveni si rasmi ah loo dhaarin doono 12-ka bisha May ee sanadka 2026-ka, kaddib markii uu mar kale ku guulaystay doorashadii madaxtinimada dalkaas.
Sida lagu sheegay bayaan ka soo baxay Wasaaradda Isgaarsiinta Qaranka oo loo sii mariyay Xarunta Warbaahinta Uganda, munaasabadda caleema-saarka ayaa ka dhici doonta Fagaaraha Kololo ee magaalada Kampala.
Munaasabaddan ayaa hal-kudheg looga dhigay: “Ilaalinta Guulaha la gaaray iyo in Tallaabo Tayo leh loo qaado dhanka Dalalka Dakhligoodu Dhexeeyo balse Sarreeya.”
Bayaanka ayaa intaas ku daray in ay si xowli ah u socdaan qabanqaabada munaasabadda, taas oo uu hormuud ka yahay Guddiga Qabanqaabada Qaranka oo uu guddoomiye u yahay Xoghayaha Joogtada ah ee Xafiiska Madaxweynaha, Xaaji Yuunus Kakande.
Waxaa sidoo kale la xusay in madax iyo diblomaasiyiin shisheeye oo kala duwan la filayo in ay ka soo qayb-galaan xafladda.
Ku-dhawaaqistan ayaa waxaa warbaahinta la wadaagay Agaasimaha Fulinta ee Xarunta Warbaahinta Yugaandha, Allan Kasujja.
Dhowaan ayay ahayd markii Guddiga Doorashooyinka Uganda ay ugu dhawaaqeen in Museveni uu ku guulaystay doorashadii madaxtinimada ee dhacday 15-kii bishii Janaayo, taas oo u xaqiijisay muddo-xileedkiisii toddobaad ee xafiiska.
Sida la soo wariyay, wuxuu helay 71.65% codadkii la dhiibtay, halka musharaxii ugu weynaa ee la tartamayay, Robert Kyagulanyi Ssentamu oo si weyn loogu yaqaano Bobi Wine, uu isna helay 24.72%.
Madaxweyne Museveni, oo 81 jir ah, ayaa dalka Yugaandha hoggaaminayay tan iyo sanadkii 1986-kii, waxaana lagu wadaa in uu sii dheereysto muddo-xileedkiisa dheer kaddib meel-marinta doorashadan ugu dambaysay.
