Wasaaradda Arrimaha Gudaha, Federaalka iyo Dib-u-heshiisiinta ee Dowladda Federaalka Soomaaliya ayaa ku dhawaaqday in doorashada Guddoonnada iyo hoggaanka Golayaasha Deegaanka ee degmooyinka Gobolka Banaadir la qaban doono 5-ta Luulyo 2026.
War-saxaafadeed ay Wasaaraddu soo saartay ayaa lagu sheegay in ururrada siyaasadda iyo xubnaha golayaasha deegaanka ee lagu soo doortay doorashooyinkii deegaanka ee Muqdisho ka dhacay bishii Diseembar 2025 ay isu diyaariyaan doorashada. Wasaaraddu waxay sheegtay in taariikhda doorashada la go’aamiyay kadib markii la tixgeliyay munaasabadaha Toddobaadka Xorriyadda ee dalka ka socda.
Doorashadan ayaa ka dhigan wejiga xiga ee geeddi-socodka dowlad-dhiska heer deegaan, iyadoo daba socota doorashooyinkii golayaasha deegaanka ee Gobolka Banaadir ee lagu qabtay nidaamka qof iyo cod.
Doorashooyin la mid ah oo lagu soo dooranayo hoggaanka golayaasha deegaanka ayaa hore uga qabsoomay degmooyinka Dowlad Goboleedka Koonfur Galbeed.
Doorashada la filayo inay dhacdo 5-ta Luulyo ayaa dhamaystiri doonta dhismaha hoggaanka golayaasha deegaanka ee dhammaan degmooyinka Gobolka Banaadir.
