First Lady of Nigeria Oluremi Tinubu yesterday launch di Northeast part of National Community Food Bank Programme (NCFBP) for Maiduguri, wey be Borno State capital.
Na part of di effort to tackle child malnutrition and food wahala among poor people.

Di initiative, wey dem design to help malnourished mothers, pregnant women, and pikin from zero to six years, go provide nutritious food to families wey dey at risk, through community-based system.

While launching di initiative, di First Lady describe child malnutrition as serious national problem wey need quick and continuous intervention.
Mrs Tinubu note sey millions of Nigerian pikin still no get good food to eat.

For one statement wey im Senior Special Assistant on Media, Busola Kukoyi, release for Abuja, di First Lady talk sey di expansion of dis food bank programme across di country na to help close dis gap and make sure say vulnerable people get di food wey dem need to survive and grow well.

“For world level, community food banks don show sey dem be good way to give nutritious food to those wey need am most. By building strong partnership between farmers, food producers, companies, and communities, food banks dey help join where food plenty and where food dey scarce,” she tok.

Mrs Tinubu stress sey di success of di programme go depend on strong collaboration between government, private sector people, and communities. She urge more individuals and organisations to support di initiative.

She explain sey dem choose Borno State for di Northeast rollout because of di region security problems wey don make food shortage and malnutrition worse.

Di First Lady hail Borno State Governor Babagana Zulum for empowering 2,000 women.