Di Governor of Central Bank of Nigeria (CBN), Olayemi Cardoso, don warn say climate change dey pose direct financial wahala for African economies, with plenty implications for sovereign ratings, cost of capital, inflation, food security, insurance markets and fiscal sustainability.

Cardoso yarn dis one for Cairo during di Egypt 30by30 Programme wey Central Bank of Egypt and International Finance Corporation (IFC) arrange. E tok say we no fit treat climate risk as environmental mata alone again, because e don turn core financial stability mata for di continent.

E talk say, "Climate risk na financial risk. E dey affect sovereign ratings, cost of capital, inflation dynamics, food security, insurance markets and fiscal sustainability."

E note say even though Africa dey contribute di least to global climate change, we dey suffer some of di highest costs. According to am, dis reality mean say African central banks and development finance institutions (DFIs) need to act well-well and work together.

Cardoso yarn say Africa must grow, industrialize, create jobs, open more opportunities and lift millions of pipo from poverty, even as we dey reduce carbon emissions and build climate resilience.

E add say di vision behind di 30by30 initiative show say Africa get common dream – say our future must be resilient, climate-aware and economically sustainable.

Cardoso tok say resilience begin with credibility, and e note say di disciplined and transparent reforms wey dey happen for Nigeria dey strengthen macroeconomic fundamentals and restore confidence for di financial system.