Guddiga Madaxa-bannaan ee Qaranka ee Doorashooyinka iyo Xuduudaha (NIEBC) ayaa shaaciyay jadwalka doorashada Guddoomiyaha Golaha Wakiillada Dowlad Goboleedka Koonfur Galbeed iyo hoggaanka Dowlad Goboleedka Koonfur Galbeed.
Sida ku cad jadwalka, gudbinta codsiyada musharraxiinta Guddoomiyaha iyo Guddoomiye Ku-xigeennada Golaha, iyo sidoo kale soo saarista liiska kama dambaysta ah ee musharraxiinta, waxay dhici doontaa inta u dhaxaysa 2’da ilaa 3’da bisha Juun.
4’ta Juun, musharraxiinta u tartamaya Guddoomiyenimada Golaha ayaa jeedin doona khudbadahooda ololaha doorashada, waxaana isla maalintaas la qaban doonaa doorashada Guddoomiyaha iyo Guddoomiye Ku-xigeennada Golaha Wakiillada.
Gudbinta codsiyada musharraxiinta u tartamaya xilka Hoggaamiyaha Dowlad Goboleedka Koonfur Galbeed ayaa dhici doonta inta u dhaxaysa 5’ta ilaa 6’da Juun, halka liiska rasmiga ah ee musharraxiinta la shaacin doono 7’da bisha Juun.
Musharraxiinta u tartamaya hoggaanka Koonfur Galbeed ayaa jeedin doona khudbadahooda ololaha doorashada 8’da Juun.
Doorashada Hoggaamiyaha Dowlad Goboleedka Koonfur Galbeed ayaa loo qorsheeyay in ay qabsoonto 10’ka Juun, iyadoo la raacayo jadwalka doorashada ee uu soo saaray Guddigu.
