Wasiirka Caddaaladda iyo Arrimaha Dastuurka ee Dowladda Federaalka Soomaaliya, Mudane Xasan Macallim Maxamuud, ayaa kulan la qaatay Wasiirka Ganacsiga iyo Warshadaha, Mudane Jamaal Maxamed Xasan, si loo dardargeliyo dib-u-habeynno lagu xoojinayo qaab-dhismeedka sharci iyo nidaamka caddaaladeed ee la xiriira ganacsiga dalka.
Kulanka ayaa diiradda lagu saaray muhiimadda ay leedahay horumarinta nidaam sharci oo hufan, lagu kalsoonaan karo, isla markaana u adeegaya kobaca dhaqaalaha iyo dhiirrigelinta maalgashiga gudaha iyo kan dibadda.
Labada wasiir ayaa ku heshiiyay in la dhiso maxkamado ganacsi oo gaar ah oo awood u leh inay si degdeg ah oo xirfad leh u qaabilaan dacwadaha ganacsi, si loo yareeyo dib u dhacyada loona hubiyo in ganacsatada iyo maalgashadayaashu helaan caddaalad waqtigeeda ku timaadda.
Waxay sidoo kale isla garteen in la sameeyo hannaan rasmi ah oo lagu xalliyo khilaafaadka ganacsi, oo ay ku jiraan habab kale oo ka baxsan maxkamadaha, si loo helo xalal wax ku ool ah oo kharash yar ku baxa, isla markaana kor loogu qaado kalsoonida jawiga ganacsiga.
Si loo hubiyo fulin isku-duwid leh oo wax ku ool ah, wasiirradu waxay ku heshiiyeen in la dhiso guddi farsamo oo wadajir ah, kaas oo ka shaqeyn doona dejinta qorshe hawleed cad iyo hirgelinta tallaabooyinka la isku raacay, iyadoo la ilaalinayo danta guud iyo horumarinta dhaqaalaha qaranka.
