Safiirka Soomaaliya u fadhiya Jarmalka iyo Poland, Danjire Cabdicasis Maxamud Maxamed, ayaa si rasmi ah Warqadaha Aqoonsiga u gudbiyay Madaxweynaha Hungary, Tamás Sulyok, munaasabad lagu qabtay magaalada Budapest 17-kii Febraayo 2026.
Intii lagu jiray munaasabadda, Safiirka ayaa si rasmi ah loogu aqoonsaday Safiir Aan Deggeneyn oo Awood Buuxda leh oo ka socda Jamhuuriyadda Federaalka Soomaaliya una fadhiya Hungary.
Munaasabaddan ayaa noqotay markii ugu horreysay ee Safiir Soomaaliyeed si rasmi ah warqadaha aqoonsiga ugu gudbiyo Hungary, taasoo astaan u ah tallaabo muhiim ah oo ku saabsan xiriirka diblomaasiyadeed ee u dhexeeya labada dal.
Hadal uu jeediyay, Safiirka ayaa ku tilmaamay munaasabadda mid ka tarjumeysa dadaallada ballaaran ee Soomaaliya ay ku ballaarineyso ka qeybgalkeeda caalamiga ah isla markaana ku xoojineyso xiriirka laba geesoodka ah. Wuxuu adkeeyay in Soomaaliya ay sii waddo xoojinta joogitaankeeda caalamiga ah iyo dhisidda iskaashi cusub si loo taageero himilooyinka horumarineed ee qaranka.
Hungary ayaa lagu tilmaamay saaxiib muhiim u ah Soomaaliya gudaha Yurub, gaar ahaan dhinacyada iskaashiga ee gacan ka geysta horumar waara, dhisidda awoodda hay’adaha, iyo wada shaqeynta dhaqaale.
Gudbinta warqadaha aqoonsiga ayaa muujineysa cutub cusub oo u furmaya xiriirka Soomaaliya iyo Hungary, taasoo u gogol xaareysa iskaashi diblomaasiyadeed iyo mid dhaqaale sannadaha soo socda.
