Dab ka kacay xero barakacayaal oo ku taalla gobolka Waqooyiga Daarfuur ee Suudaan, ayaa 60 qoys ka dhigay hoy la’aan, sida ay Talaadadii sheegtay Hay’adda Caalamiga ah ee Socdaalka (IOM).
Hay’adda Qaramada Midoobay ayaa sheegtay in dabku ka kacay xerada Al-Omda ee deegaanka Tawila, isagoo burburiyay ku dhowaad 50 hoy, qaar kalena si qayb ah u waxyeelleeyay. Qoysaska barakacayaasha ah ayaa loo raray meelo bannaan oo isla deegaankaas ku yaalla.
Kumanaan qof oo barakacayaal gudaha ah ayaa ku nool xerada Al-Omda, iyagoo degan hoy ku-meelgaar ah oo laga sameeyay alwaax, caws iyo agab kale oo si fudud u guban kara.
Sababta dabka dhalisay weli lama oga.
Horaantii Talaadada, IOM ayaa sheegtay in dab ka kacay xerada uu barakiciyay 237 qoys, isagoo burburiyay 158 hoy isla markaana waxyeelleeyay 79 kale.
Toddobaadkii hore, Golaha Isku-duwidda Qolalka Gurmadka Degdegga ah ee Tawila, oo ah hay’ad gargaar oo maxalli ah, ayaa sheegay in ilmo yar uu ku dhintay islamarkaana ku dhowaad 1,500 qoys ay saameysay kadib dab kale oo gaar ah oo gubay 250 hoy oo ku yaallay isla xeradaas.
Suudaan ayaa tan iyo Abriil 2023 ku jirtay colaado dhiig badan ku daatay oo u dhexeeya ciidanka iyo maleeshiyada Rapid Support Forces (RSF), kuwaas oo dilay tobanaan kun, barakiciyay ku dhowaad 13 milyan oo qof, isla markaana sababay mid ka mid ah dhibaatooyinka bani’aadamnimo ee ugu xun dunida, sida lagu sheegay warbixinno Qaramada Midoobay.
