Danjiraha Jamhuuriyadda Federaalka Soomaaliya u fadhiya Boqortooyada Sacuudiga, Maxamed Amiin Sheekh Cismaan, ayaa kulan la yeeshay Wasiir Ku-xigeenka Arrimaha Dibadda ee Boqortooyada Sacuudiga, Waliid Al-Khuraiji.
Kulanka ayaa diiradda lagu saaray xoojinta xiriirka laba geesoodka ah iyo ballaarinta iskaashiga u dhexeeya Soomaaliya iyo Sacuudiga, iyadoo labada dhinac ay ka wada hadleen sidii loo sii horumarin lahaa danaha wadajirka ah ee labada dal ee walaalaha ah.
Doodaha ayaa ka tarjumayay sida ay Soomaaliya iyo Sacuudigu uga go’an tahay sii qotomidda xiriirkooda soo jireenka ah iyo kor u qaadidda wada-shaqeynta dhinacyada ay labada waddan wadaagaan iyo danaha muhiimka ah.
Kulankan ayaa qeyb ka ah dadaallada joogtada ah ee lagu xoojinayo xiriirka diblomaasiyadeed iyo iskaashiga istaraatiijiyadeed ee u dhexeeya Jamhuuriyadda Federaalka Soomaaliya iyo Boqortooyada Sacuudiga.
