Wasiirka Warfaafinta, Dhaqanka iyo Dalxiiska ee Dowladda Federaalka Soomaaliya, Cabdifataax Qaasim Maxamuud, ayaa Talaadadii xarunta wasaaradda ee Muqdisho ku qaabilay Ku-simaha Safiirka Liibiya ee Soomaaliya, Nasr Maxamed Al-Sanusi, booqasho xushmadeyn ah oo looga gol lahaa xoojinta xiriirka labada dhinac.
Intii ay booqashadu socotay, Wasiir Cabdifataax ayaa safiirka warbixin ka siiyay hay’adaha iyo howlaha muhiimka ah ee wasaaradda, oo ay ka mid yihiin Telefishinka Qaranka Soomaaliyeed (SNTV), Raadiyaha Muqdisho, Wakaaladda Wararka Qaranka Soomaaliyeed (SONNA), wargeyska Dalka, iyo kaydka qaranka ee Raadiyaha Muqdisho.
Kadib booqashada, labada mas’uul ayaa yeeshay wada-hadallo diiradda lagu saaray iskaashiga Soomaaliya iyo Liibiya ee dhinacyada warfaafinta, dhaqanka iyo dalxiiska. Safiir Al-Sanusi ayaa hambalyo u diray wasiirka magacaabistiisii dhaweyd, wuxuuna muujiyay kalsoonida uu ku qabo hoggaamintiisa horumarinta himilooyinka istaraatiijiyadeed ee wasaaradda.
Kulanka ayaa sidoo kale looga hadlay fursadaha lagu ballaarin karo iskaashiga hay’adaha, kor loogu qaadi karo isdhaafsiga khibradaha iyo waayo-aragnimada, isla markaana lagu xoojin karo xiriirka labada dal.
Labada dhinac ayaa mar kale xaqiijiyay sida ay uga go’an tahay xoojinta wada-shaqeynta iyo isku-duwidda dhinacyada warbaahinta, dhaqanka iyo dalxiiska, iyagoo adkeeyay muhiimadda xiriirka walaaltinimo ee soo jireenka ah ee ka dhexeeya Soomaaliya iyo Liibiya iyo danahooda wadajirka ah ee ku aaddan sii socodka iskaashiga.
