Wasiiru Dowlaha Arrimaha Dibadda iyo Iskaashiga Caalamiga ah ee Dowladda Federaalka Soomaaliya, Cali Cumar, ayaa kulamo laba geesood ah la yeeshay mas’uuliyiin sare oo Carbeed iyo kuwa gobolka, kuwaas oo ka dhacay dhinacyada Shirka Wasiirrada Arrimaha Dibadda ee Jaamacadda Carabta ee lagu qabtay magaalada Cammaan ee dalka Urdun. Kulamadan ayaa ujeeddadoodu ahayd xoojinta xiriirka diblomaasiyadeed iyo kor u qaadidda iskaashiga arrimaha labada dhinac ay danaha ka wadaagaan.
Wasiiru Dowlaha ayaa la kulmay Wasiiru Dowlaha Arrimaha Dibadda ee Dowladda Qatar, Suldaan Bin Sacad Al-Muraikhi, halkaas oo labada dhinac ay isku dhaafsadeen aragtiyo ku saabsan xaaladaha gobolka isla markaana ay ka wada hadleen sidii loo sii xoojin lahaa iskaashiga u dhexeeya Soomaaliya iyo Qatar.
Sidoo kale, wuxuu kulan la yeeshay Wasiirka Arrimaha Dibadda iyo Iskaashiga Caalamiga ah ee Jamhuuriyadda Jabuuti, Cabdulqaadir Xuseen Cumar. Kulanka ayaa diiradda lagu saaray xiriirka walaaltinimo ee soo jireenka ah ee ka dhexeeya labada dal ee deriska ah iyo fursadaha lagu ballaarin karo iskaashiga qaybaha muhiimka ah.
Kulanka saddexaad, Wasiiru Dowlaha ayaa la yeeshay Wasiirka Arrimaha Dibadda, Iskaashiga Afrika iyo Muwaadiniinta Mauritania ee Dibadda Jooga, Maxamed Saalim Ould Merzoug. Labada mas’uul ayaa dib u xaqiijiyay xiriirka adag ee u dhexeeya Soomaaliya iyo Mauritania, iyagoo carrabka ku adkeeyay muhiimadda sii wadista isku-duwidda iyo wada shaqeynta heer laba geesood ah, heer Jaamacadda Carabta, Midowga Afrika, iyo fagaarayaasha kale ee caalamiga ah si loo taageero nabadda, xasilloonida, iyo barwaaqada gobolka.
Kulamadan ayaa muujinaya dadaallada diblomaasiyadeed ee joogtada ah ee Soomaaliya ay la leedahay dalalka saaxiibka la ah, iyo sida ay uga go’an tahay xoojinta iskaashiga gobolka iyo horumarinta danaha wadajirka ah ee lagu gaari karo fagaarayaasha Carbeed, Afrikaan iyo kuwa caalamiga ah.
