At least 130 Nigerians don already register for voluntary evacuation flights from South Africa, as Nigeria dey move to protect im citizens sake of rising tension wey anti-foreigner protests cause for dat kontri.

Di Minister of Foreign Affairs, Bianca Odumegwu-Ojukwu, for one situation report wey she post for her X handle on Sunday, talk say di evacuation arrangement na part of bigger diplomatic and security measures wey dem dey coordinate with Nigerian missions for South Africa.

Di minister explain say di evacuation plan follow directive from President Bola Tinubu, wey order say make dem monitor di situation well-well and make dem protect Nigerians for abroad better.

“Di President don talk again say wetin matter most for this time na di safety of our citizens,” she tok, adding say “arrangement dey go on now to collect details of Nigerians wey dey South Africa for voluntary repatriation flights for those wey need help to return home.”

Odumegwu-Ojukwu tok say, “So far, 130 applicants don register for di exercise with our mission,” noting say di number go likely increase as more citizens want help to return home.

Odumegwu-Ojukwu still confam say di ministry don summon South Africa Acting High Commissioner over di unrest, while diplomatic talks dey continue with authorities for South Africa.

Dis one dey happen as new anti-immigrant protests don start again for cities including Pretoria and Johannesburg, wey Nigerian authorities say don increase fear for di safety of dia citizens.

“Dere serious fear over di series of anti-foreigner protests, wey also target Nigerians for some cities for Republic of South Africa for recent weeks,” di minister tok.

She add say di President don “show serious concern over di situation after dem brief am, and don call for more effective control of di situation by di host security services wey suppose handle am.”