President Bola Tinubu don reaffirm Nigeria commitment to strengthen security cooperation wit dia neighbor Chad and don promise renewed joint action to fight terrorism and banditry across Lake Chad region.

President Tinubu make di promise on Thursday while e receive di President of Chad, Mahamat Idriss Déby, for Presidential Villa, Abuja.

Di two leaders hold joint press conference wey focus on regional security and collective strategies to handle emerging threats.

Wen e describe di visit as timely, Tinubu say e provide opportunity to reinforce bilateral ties and deepen collaboration for tackling insecurity wey dey affect kontris for di region.

According to am, Nigeria and Chad remain critical partners under di Multinational Joint Task Force (MNJTF), wey dem set up to confront terrorism and oda transnational threats for Lake Chad Basin.

“Our discussions centre on di security challenges wey dey face our region. Chad na critical partner for MNJTF, and together, we don resolve to combat terrorism, eliminate acts of terror and ensure di safety and sovereignty of our nations,” di President talk.

E stress say both kontris share common responsibility to secure dia borders and protect dia citizens, e note say sustained cooperation among neighboring states dey essential for achieving lasting peace.

Tinubu still highlight di longstanding relationship between Nigeria and Chad, e talk say di two nations dey build on di legacy of dia forefathers to promote stability, economic growth and regional development.

“We don come far. Wetin we inherit from our forefathers na di responsibility to ensure peace and stability for di development of our region,” e state.

Di President note say improved security go boost trade, economic cooperation and social integration, e add say geographical boundaries and language differences suppose serve as opportunities instead of barriers to progress.