Nigeria don step up im engagement with BRICS kontris to boost farming production and expand trade, according to di bilateral agreement wey dem get inside di group.

For di ongoing BRICS Agriculture Ministers’ Conference for India, di Minister of Agriculture and Food Security, Senator Abubakar Kyari, call for stronger global cooperation to solve food security wahala.

“Nigeria still be di biggest agribusiness hub for Africa,” Kyari tok, e add say di kontri dey work closely with BRICS members, including Brazil and India, to strengthen food production and agribusiness value chains.

E tok say di federal government dey priority to develop Special Agro-Processing Zones all over di kontri to attract investment from Africa and beyond.

Kyari urge BRICS kontris make dem take advantage of Nigeria agricultural potential.
“With plenty arable land and gateway market to di whole continent, we dey offer members and partners place to invest, trade, and grow together,” e tok.

E stress say Nigeria agricultural policies dey focus on supporting farmers, especially smallholder farmers, women and youths.

“Everything we don talk about today begins and ends with di farmer — di productive smallholder farmer, di empowered woman and di confident young farmer. Serve dem well, and we go secure di future of food,” e add.

For anoda separate meeting, Kyari also reaffirm say Nigeria go continue to strengthen agricultural cooperation with India during di bilateral meeting with im Indian counterpart, Shivraj Singh Chouhan.

Di discussion focus on how to deepen strategic partnerships for agricultural technology, crop production and trade for key agricultural commodities wey concern both sides.